Spurs leh Kane inkar a zau zel?

Tottenham manager thar Nuno Espirito Santo chuan a striker Harry Kane nen an la inbiak loh thu a sawi. England captain hian Spurs training a la zawm lo a, tun nipui bazar chhungin club dang a zawm san ngei dawn niin a lang.

Nilaini zan khan Tottenham hian season thar inbuatsaih nan Chelsea an hmachhawn a, London club pahnih hi 2-2 in an inhnehtawk. Inkhelah hian Kane a inlan lo a ni satliah lo, squad-ah pawh a la awm ve thei lo.

Spurs manager Nuno chuan, "Harry nen hian kan inbiak ngei ka beisei, mahse hun remchang a la awm lo. Mipui hriata sawi chhuah vak ai chuan puitling takin thil awmdan kan sawidun turah ka ngai," tiin a sawi.

Kum 28 mi Kane hian Tottenham tan goal 221 a khung tawh a, mahse a club hi nomawi a la chawipui thei lo. Tun hmain club chhuahsan a duh thu a lo sawi tawh, mahse Spurs chuan an striker hi awlsam taka chhuahtir mai erawh an tum bik lo.

Premier League champion Manchester City nen Kane hi sawizawm mek a ni a, khawtlang media-ten an tarlan dan chuan North London club-in Kane man zat atan an chhiar pound maktaduai 160 chu City hian pek an huam.

Kane chungchang zawhna chhang zuiin Nuno chuan, "Kei chuan sawi theih ka nei lo. Harry chungchang hi chu chhungrila sawi tur zawk a ni," tiin a sawi, season tharah a striker hi a chhawr theih a rinawm ta lo.

Chelsea lakah hian Spurs goalkeeper thar Pierluigi Gollini a inlan. Atalanta aṭanga loan hmanga an hawh hian Hakim Ziyech-a goal khung tur vawi hnih a dang thei lo, 2-0 a nih hnuah Spurs lamin Lucas Moura leh Steven Bergwijn te hmangin siphurh an sut a ni.