Mizo tlangval Jeremy-a'n India a awp

Jeremy Lalrinnunga chuan 72nd Men's & 35th Womens' Senior National Weightlifting Championships neih laiah Mizoram tan gold medal a chawi chhuak a, senior huanga national championhsip a khelh hmasak berah hlawhtlinna a chang nghal.

Khudiram Anushilan Kendra, Kolkata-a inelna neihah Mizo rawlthar Jeremy hi 67kg huangah a inlan a, snatch 132kg bakah clean & jerk 167kg - total 299kg chawiin India ram chhungah amah tluk an awm lo.

Govt. Complex rawlthar hi a kum a la tam lo a, junior leh youth huangah pawh a la inlan thei. India tan senior huangah feh chhuak tawhin silver medal la tawh mah se tun ṭum hi ram chhunga senior inelna a hmachhawn hmasak ber ṭum a ni.

Clean & Jerk bikah hian tun hmain 166kg chawiin record a lo siam tawh, tun ṭuma 167kg a rawn chawi hi ama record lo siam tawh khumin national record a rawn siam thar - kawng khatin hma a sawn belh tihna a ni.

A pumpuiah erawh International Qatar Cup-a 306kg a chawi tawh chu tun ṭumah hian a phak lo deuh. Amaherawhchu, nikum December thlaa inelna an neih hi chu khawvel pum huap a ni a, tun ṭuma mi hi chu India ram huap a ni thung.

Senior National Weightlifting Championship-ah hian Mizoram aṭangin infiammi paruk an inlan a, nimin thleng kha chuan Jeremy bak medal la an la awm lo. Vawiin hian Lalchhanhimi chu 71kg huangah a inlan ve leh ang.

Mizo rawlthar Lalzuidika, TBC Lalchhanhima leh Jacob Vanlaltluanga te chuan tun ṭumah hian medal hlawh chhuak lo mah se October 24 aṭanga neih tur National Games atan an tling nghal, an tan chanchinṭha a tling tho.

Mizoram team kaihruaitu, SYS coach Malsawma Khiangte chuan, "Youth leh Junior kha a hlu a, tunah chuan senior huangah gold medal kan la ta. Tun hma 

aṭanga kan lo suangtuah ṭhin, mahse a tak a thleng thei ang tih kan rin ngam chiah loh kha tunah chuan a tak ram a chang," tiin Vanglaini a hrilh.

Youth Olympic champion Jeremy Lalrinnunga'n inelna a hmachhawn hi a pa Lalneihtluanga (Maneiha) chuan mahni sum leh pai sengin a hmunah a en. Inelna buatsaihtu lamin Jeremy-a pa a ni tih an hriatin an lawmpui a, a fapa hi gold medal an hlantir!

Vanglaini zawhna chhangin Jeremy chuan, "A dangdai khawp mai, ka rin phak bak a ni. Kan tana Pathian ṭhat bikzia a takin ka hre chhuak thar leh ṭhin, nidanga ka medal lak nen chuan a inang lo lutuk ringawt," tiin a pa Maneihna hnen aṭanga medal a dawn chungchang a sawi.

Jeremy hian gold medal a pa hnen aṭanga a dawn hian Bible chang - Ephesi 6:1-3 chu a rilruah a rawn lan nasat thu a sawi. "Naupangte u, Lalpaah chuan in nu leh in pate thû zawm rawh u; chu chu thil dik a ni si a. I nu leh i pa chawimawi rawh (chu chu thupek tiam nei hmasa ber a ni); chutichuan, i tân a ṭha ang a, leiah hian i dam rei bawk ang."

Maneiha chuan, "Ka fapa infiam en turin ka kal a, rin loh tak maiin official lam khan min lawmpui a, lawmman sem turin chawpchilh takin min rawn sawm chhuak. Kan rin loh leh beisei phak loh thil a thleng a ni," tiin Vanglaini a hrilh.

Tun ṭuma inelna hi chu Olympic qualifier zingah a tel lo a, India ram chhung inelna lian pakhat a ni. Nipui laia neih tur Tokyo Olympic khel phak tur pawhin Jeremy hi dinhmun ṭha takah a ding mek, a chesual viau a nih ngawt loh chuan infiamna khawmpui lianah Mizo rawlthar hmel hmuh theih a beiseiawm.