Fofana ke ruh a tliak

Leicester defender Wesley Fofana chuan Villarreal nena pre-season friendly an khelhah a ngal ruh a titliak a, he thu buatsaih a nih thleng hian a chawlh chen tur erawh puanzar a la ni lo thung.

Kum 20 mi centre back hi Fer Nino-a'n ṭul lo taka a hliam a ni a, zawnchhuah a ngai - Foxes hian Caglar Soyuncu, Harvey Barnes leh Ayoze Perez goal khung hmangin 3-2 in hnehna chang mah se an lawm a kim lo ang tih a chiang.

Fofana chuan, "Ni duhawm lo tak a ni a, mahse, club ropui leh medical team ṭha tak enkawlna hnuaiah ka awm a ni. Chiang lehzuala enfiah a nih hnuah ka hliam dan dik tak chu puanzar leh a nih theih ka beisei a, tunah erawh ka ngal ruh tê zawk hi a tliak tih kan chiang tawh.

"Hei aia ṭha zawk hian ka lo kir leh thuai ang, lo lungphang suh u," tiin social media lamah a tarlang a, rang taka lo kir leh tura beisei erawh a harsa rih hle.

Fofana hian season hmasa ṭan dawn khan Ligue 1 club Saint-Étienne aṭangin Leicester hi a zawm a, a season hmasa berah match 38 khel nghalin FA Cup-ah a champion pui - Leicester Young player of the season atan thlan a ni hial.

Leicester hian August 7 zanah Community Shield khelin season an ṭan dawn a, Premier League champion Manchester City nen an inkhel ang.