Vawiinah hmeichhe volleyball semifinal

Olympic hmeichhe volleyball semifinal chu vawiin hian khelh a ni dawn. Chawhma dar 9:30-ah Serbia leh United States te an inkhel ang a, tlai dar 5:30-ah Brazil leh South Korea te an inkhel ang.

United States hi pool B hmahruaitu an ni a, match nga an khelhah vawi li chakin Russian Olympic Committee chiah an hneh lo. US hian semifinal lut turin quarterfinal-ah Dominican Republic chu 3-0 in an hneh.

Serbia hian Domi-nican Republic hi pool match-ah 3-0 in an hneh tawh bawk a, anni hi pool A pahnihna an ni thung. Semifinal lut turin Serbia hian pool B pahnihna Italy chu 3-0 in an hneh a, inrintawkna an ngah phah sawt ang.

Rio 2016-ah khan Serbia hian silver medal an dawng a, semifinal-ah United States hi an hneh. Semifinal hnuhnung zawk khel tur Brazil hian an khingpui an la hneh vek a, 2008 leh 2012 khan gold medal an la tawh bawk.

Brazil hian spiker ṭha Rosamaria Montibeller an kawl a, South Korea lakah pawh an innghahna tur a ni leh ang. Pool match-ah Brazil hian South Korea hi 3-0 in an hneh tawh a, hemi a nih avang hian final khel tura rinkai zawk an ni ang.