Sum tam tak hnawla hmangaihna thlangtu 'One Club Player'

Kan Pathian thu meuhin, "Tangkain engkim a si thlu," (Thuhriltu 10:19) tia min hrilhna khawvelah hian "Sum ngah ngah hmelṭha" tih a bang thei lo a, infiamna khawvelah pawh he thu hi a dikna hmuh turin a awm zel.

A bik takin football khawvelah club hausa tharten nomawi chu an lei chhuak emaw tih mai turin sum an vawrh nasa a, club lian ni lo tan chuan nomawi hnaih vena chance a vang pharh ta.

Tun hnaiah pawh Aston Villa captain Jack Grealish leh Tottenham Hotspur striker Harry Kane te chu sum ngah Manchester City-in an hel mek a, player pahnih hian anmahni siam liantu club hnuchhawnin ropuina leh sum lam pan an tum mek.

Mahse, khawvelah hian tu nge maw indem thei awm chuang le? Ropuina leh sum duha intlansiak vek kan ni a, tu fain nge hmingthanna chu duh loa sum tam tak hnar phal ang?

Mahse, chhanna pek harsa tak anga lang hi football khawvela mi tlemtête chuan inchhuang takin an chhang thei tlat - ropui an duh lo a ni lo a, sum tam zawk an duh lo a ni lo. Hmangaihna nen meuha inthleng an phal lo mai chauh zawk a ni.

Ryan Giggs (Man Utd)
Manchester United fan-ten theihnghilh theih loh player pakhat an nei a, a hming chu Ryan Giggs a ni. Manchester United legend hian kum 1990 chho khan a hunlaia club lian AC Milan sawmna a hnar a, a inchhir erawh a rinawm loh.

Welsh winger hian United-ah nomawi 34 a chawi a, heng zingah hian Premier League (13), Champions League (2), FA Cup (4) leh League Cup (3) a tel a, Red Devils tana inlan hnem ber niin match 963-a khel bawk.

Paul Scholes (Man Utd)
France legend Zinedine Zidane kha khawvela midfielder ṭha ber nih a nawm leh nawm loh zawh a ni a, a chhanna erawh, "Ka hre lo, Paul Scholes zawt rawh u," tih a ni.

Euro 2000 khan Scholes hi Inter Milan-in an sawm a, mahse, English midfielder hian khawvela club lian bera a khelh thuin a lo chhang - nomawi 25 zet United tan a chawi a, match 718-ah a inlansak.

Matt le Tissier (Southampton)
Giggs leh Scholes-ten fak an phu a ni mai thei a, rinawm vanga anni aia fak phu kan thlang dawn a nih erawh chuan Matt le Tissier hi lam loh theih a ni lo - Giggs leh Scholes te khelhna chu United a ni a, Le Tissier erawh Southampton a ni tlat.

Saints tan match 540 a khelha goal 209 khung thei attacking midfielder, Premier League midfielder zinga goal 100 khung tling hmasa ber ni bawk hian Liverpool,Tottenham leh Chelsea sawmna hnarin Saints-a rinawm a thlang tlat - penalty vawi 48 a petah vawi 47 a khung!

Paolo Maldini (AC Milan)
Mi tam takin khawvela defender ropui ber ang hiala an chhal a ni a, mahse, he defender hian AC Milan lo chu club dang a mitthla ngai lo - he club tan hian vawi 902 zet inlanin Serie A title pasarih leh European Cup panga a chawi a, a duh chu a hmu.

Manchester United manager ropui Sir Alex Ferguson khan vawi khat chu Old Trafford-a thlem luh theih beiseiin Maldini pa a hmu a, "An lu min thinsana, chu zawng chu ka chhanna hmuh chu a ni," a ti - Maldini hi tunah chuan Milan technical director-in a awm mek.

Francesco Totti (Roma)
'The Gladiator' tih hiala hming lem an pek Totti hian Roma chhuahsan duh se chuan Serie A nomawi pakhat leh Coppa Italia nomawi pahnih deuh tlawng lo hi chhuan tur a nei em em ang. Mahse, Italy tana World Cup nomawi chawitu forward hian Roma a thlah thei tlat lo.

Roma tan match 786 khela goal 307 khung chunga Roma tana match khel hnem ber leh goal khung hnem ber record chelhtu hian kum 2004 khan 'Galactico' ni tura Real Madrid sawmna a hnar a, "Ka inchhirna awmchhun a ni," tiin a sawi zui thung.

Rogerio Ceni (Sao Paulo)
Ceni hian a career chhung zawngin goal 132 a khung - a tam tawk lo i ti em? Mahse, keeper a ni tlat! Sao Paulo tan match 1,238 khelin club pakhat tana match khel hnem ber record a siam a, goalkeeper zinga goal khung hnem ber record a chelh mek bawk.

Brazil tana FIFA Confederations Cup (1997) leh World Cup (2002) nomawi chawitu hian Arsenal sawmna hnarin Europe panna chance a neih chu a hnar a, Brazil Serie A (3) leh Copa Libertadores (2) nomawi a chawi thung - a chawlh hnuah coach hna a thawk chhunzawm a, nikum khan Serie A-ah Flamengo chu a champion pui. Kum 2018 khan Fortaleza chu a vawi khat nan Serie B-ah a champion pui bawk a, a record a chhuanawm hle.

Lam loh theih loh
Liverpool legend Steven Gerrard-a'n a hunlaiin AC Milan, Real Madrid, Bayern Munich leh Chelsea sawmna a hnar a, mahse, Anfield-ah a career a hmang zo dawn emaw tih laiin a hun tawpah MLS khel turin LA Galaxy a pan thung. Rangers-ah coach hna thawkin fan-te ngaihzawn rawn a ni leh mek.

Barcelona chanchina hming dai tawh lo tur Xavi-a'n Manchester United sawmna dawng mah se Barca-a cham a thlang a, ani pawh Nou Camp-ah a career a hmang zo mai dawna a lan laiin Qatar club Al Sadd a zawm - Qatari club-ah hian coach hna a thawk zui a, season hmasa khan league nomawi chawipuiin nomawi paruk a chawipui der tawh.