Transfer-ah Aston Villla thawm a lian

Aston Villa-in captain Jack Grealish chelh thei lo mah se tun nipui transfer-a an chet danah club ṭantute an lungawi ang. Villa hian pound maktaduai 25-in Southampton aṭangin Danny Ings an lalut a, player dang hming a la ri cheu.

Kum 29 mi Ings hma hian Villa hian Ashley Young, Emiliano Buendia leh Leon Bailey te an lalut tawh. Season liam ta khan Villa hi 11-na a ni a, season tharah chuan Europe inelna khelh phak ngei an tum tih a lang.

Ings a ṭha
Aston Villa chuan Nilaini zan khan Southampton aṭanga Danny Ings an lakluh thu an puang thut a, Dean Smith-a hote hian season tharah club vantlang chunglama awm ngei tumin hma an la.

English striker Ings hian Liver-pool-ah beisei a phak loh hnuin Southampton-ah kalin hetah hian a theihna tak a pholang. Season liam ta khan Premier League-ah goal 12 a khung a, chutihrualin match 29 chauh a khel tih hriat a ṭha.

Hemi hma season-ah hian Ings hian match 38 a khel a, goal 22 a khung. Villa hian Premier League-a striker rintlak tih hriat chian sa an lalut a, season liam ta league-a goal 14 khungtu Ollie Watkins an kawl tih hriat a ṭha bawk.

Dean Smith chuan, "Danny hi Premier League footballer ṭha bik zinga tel pha a ni a, a kalna apiangah goal a khung. A rilru put hmang a dik a, hruaitu nih tling a ni a, academy player-te tan pawha entawn tur ṭha tak a ni thei ang," tiin an player thar a fak.

Saints hian Ings hi kum khat chauh contract a neih tawh avangin an club-a hlawh tam ber ni turin contract thar an zawrh a, amah-erawhchu Southampton tana match 100 khelha goal 46 khungtu hian chona thar hmachhawn a duh ta zawk a ni.

Player thar
Aston Villa-in Inter Milan champion puitu Ashley Young chu free transfer-in an la a, kum 36 mi Young hian Villa tan kum nga a khelh tawh avangin club hrechiangtu a ni a, a tawnhriat hi team tan a pawimawh bawk ang.

Norwich aṭangin pound makta-duai 33-in Emiliano Buendia an lalut a, Argentine attacking midfielder hi kum 24 chauh a nih avangin hmabak a nei êng hle. Buendia hi Villa chauhin an dawr lo a, Arsenal-in lak an tum ve bawk avangin a ṭha tawk tih a chiang.

Ings hmaa hian pound maktaduai 25-in Leon Bailey an lalut a, Bayer Leverkusen aṭanga an lakluh Jamaican winger hian Bundesliga-ah hming a chher viau tawh.

Engtin zel?
Aston Villa manager Dean Smith hi club neitu Nassef Sawiris leh Wes Edens te aṭangin thlawpna a hmu ṭha tih a lang. Villa hian Jack Grealish chelh an tum a, Man City pek phal zat aia tam hlawh pawh pek an inhuam a, amaherawhchu Grealish berin nomawi a duh avangin English champion zawm a thlang.

Villa hian Grealish hralhna aṭangin sum an nei belh dawn tihna a ni a, Norwich attacking midfielder Todd Cantwell nen sawizawm an ni leh mek. Man United defender Axel Tuanzebe pawh an beisei a, James Ward-Prowse lak tumin Southampton an dawr bawk.

Saints hian Ward-Prowse hralh an phal lo a, thil chiang erawh Aston Villa-in nipui transfer an hman ṭhat avangin ngaihven an hlawh. Dean Smith-a hote hian PremierLeague match hmasa berah Watford an hmachhawn dawn a, August 14, zan dar 7:30-ah an inkhel ang.