Alisson-a'n Liverpool tan rinawm a thlang

Liverpool goalkeeper Alisson chuan Anfield-a cham chhunzawm zel turin rinawmna thu a tiam a, kum 2027 thleng khel turin contract thar a ziak.

Brazilian keeper chuan, "Thutlukna siam harsa a ni lo," tiin Liverpool-a cham tura a inngaihtuah buai loh thu a sawi a, club nen an inkarah inrintawkna leh rinna a awm thu a sawi bawk.

Alisson hian kum 2018 khan AS Roma aṭangin Liverpool hi pound maktaduai 66.8-in a zawm a, hetihlai hian khawvela goalkeeper man to ber record a siam.

Kum 28 mi keeper chuan, "Tum kan neih a ngai a, a sang thei ang ber kan tum bawk tur a ni. A pawimawh ber chu inelna kan hmachhawn zawng zawng - Champions League, Premier League leh Cup hrang hrangahte champion hi a ni a, chuta ṭang chuan bul kan ṭan thei ang.

"Hnehna kan chan theih nana pawimawh ber erawh khelmuala kan inlan dan a ni a, kan theihna zawng zawng kan hlan zel a pawimawh a ni," a ti a, Liverpool-ah nomawi tam zawk chawi a beisei.

Brazil tana vawi 47 inlan tawh keeper hian Liverpool a pan hnuah match 130 inlansak tawhin vawi 57 cleansheet a nei thei a, goal khat a khungsak bawk!

Alisson hian May thla khan league match pawimawha West Brom nen an inkhelh ṭumin hun pek belhah chakna goal a tauh lut a, Premier League-a goal khung thei keeper parukna niin lu hmanga khung hmasa ber a ni thung.

Liverpool-a a season hmasa pahnihah FIFA FIFPro World11-a lang ve ve thei leh Best FIFA Goalkeeper (2019) lo ni tawh bawk Alisson chuan, "Kei leh ka chhungte chu he hmunah hian kan hlim em em a, ka fate hian England nuam an ti hle bawk.

"Contract thar ka ziak thei hi ka lawm a, he hmuna ka hnathawhte chhunzawmna remchang ka nei hian min tihlim hle," tiin contract thar pek a ni chu a hlim thu a sawi.

Alisson hian Liverpool a pan hnuah Premier League, Champions League leh FIFA Club World Cup nomawi a chawi tawh a, kum 2019 khan keeper ni chungin Ballon d'Or nominee-ah a lang phak hial.

Liverpool-in nipui transfer-ah player lakluh lam aiin contract thar an tuipui a, Alisson hma hian Trent Alexander-Arnold (2025) leh Fabinho (2026) te chuan Anfield-a cham zel turin contract thar an lo ziak tawh.