Eriksen-a'n Inter training a tlawh

Euro 2020-a Denmark leh Finland an inkhelh ṭuma nikhaw hre loa tlu Christian Eriksen chuan a club khelhna Inter Milan training a tlawh a, Italian club chuan an player hi, "A rilru leh taksa, engkim a ṭha vek a ni," tiin an sawi.

Kum 29 mi Eriksen hi Finland nen an inkhelh ṭuma a tluk khan thi tur ang hiala ngaihna a awm hman a, a hnuah vannei takin harh chhuak leh mah se a professional career-a chhunzawm theih loh ringtu an tam zawk.

Mahse, Tottenham Hotspur midfielder hlui hian Nilaini khan Suning Training Centre-a a ṭhiante training chu a tlawh a, Inter-in a dinhmun a ṭhat thu an sawi avangin Danish midfielder fan-te tan chuan thu hriat nuam a tling ang.

Serie A champion Inter chuan, "Copenhagen khawpuia doctor-te thurawn angin a inenkawl zel ang a, Eriksen-a chungchangah hian Inter medical staff-te chu a dinhmun hrilh zel an ni ang," tiin an sawi.

Kum 29 mi Eriksen hian January 2020 khan Inter Milan hi a zawm a, season hman zawh takah khan Serie A match 26 khelin goal thum a khung a, chawh rualin match khatah 1.9 key pass nei zel ang a ni.