Remsiami medal beiseina a tawp

Mizo nula Lalremsiami Hmar tan Tokyo Olympic medal chu khawih phakah a awm hman zauh a, mahse bronze medal hlawh chhuak tur erawhin India hmeichhe hockey team an vannei tawk lo - an beiseina chu boruakah a thamral.

Nimin zing khan India leh Great Britain ten pathumna dinhmun an inchuh, inkhel hmunawm takah ram pahnih an in lehthal tawn zak zak a, a tawpah chuan champion lai Britain zawkin 4-3 in hnehna an chang.

Tlai lamah Netherlands leh Argentina ten gold medal an inchuh zui, world number 1 Dutch team hian number 2 lakah hian 3-1 a hnehna changin an champion.

A hmuhnawm
Group match-ah ram pahnih hi an intawng tawh, India hi 4-1 in an chak lo. Remsiami awmna team hi an insiamṭha tawh, bronze medal match an khelh meuh chuan an chak loh chhan hi vanduai vang chauh a ni.

Oi Hockey Stadium-a inkhelah Britain lamin Elena Rayer (16') leh Sarah Robertson (24') te hmangin hma takah hma an hruai, chak turin an dinhmun a ṭha hman hle - mahse India lamin Gurjit Kaur (25', 26') hmangin an sut zo thut.

Chawlhlawk hmain India hian Vandana Katariya (29') hmangin hma an hruai let daih. Boruak in lumlet karah Britain an tlalbuai duh bik lo, Hollie Pearne-Webb hmanga si phurh an sut hnuah, quarter hnuhnung berah Grace Baldson hmangin chakna goal an khung.

Mizo nula
Tokyo Olympic-ah India team hian match sarih an khel, inkhelah hian Lalremsiami a inlan kim vek. Thenzawl Hockey Training Center aṭanga inzir chhuak forward hian Britain lakah pawh hun ṭha a nei, ball a vir pui hnua a hlap ṭha zet chu keeper-in a lo dang hram.

India 2-1 a an hniam laiin Kolasib nula hian penalty corner a hlawh chhuak a, si phurh sut nan an hman theih phah. Quarter hnuhnung berah India hian yellow card leh green card hmuh vangin a zawnin player an chan, a tlem zawk an nih laia an goal chhuah an sut thei ta lo.

Remsiami chuan, "Theihtawp kan chhuah a, mahse kan duhthusam chu kan thleng thei ta lo. Mizo mipuiten min ṭawngṭaisak ṭhin tih ka hria, ka lawm takzet. India leh Mizoram tan ka bei zel ang," tiin Vanglaini a hrilh.

Odisha rah chhuah
India mipa hockey team ten bronze medal an la, kum 49 hnua an hlawhtlin lehna hmasa a ni. Hmeichhe team pawhin medal beisei phak mah se an vanduai ta thung - India hockey a ṭhanharh leh theih nan hian Odisha sorkar in a thawh hlawk hle.

Odisha hian hockey din thar leh nan theihtawp an chhuah. 2018 khan Hockey India chu kum nga chhung atan inremna a neih pui, an inremna hi Times of India ziah dan chuan vaibelchhe 140 hu a ni - mipa leh hmeichhe team enkawl nana tih a ni. 

Tata Group nena thawkhoin, Odisha Naval Tata Hockey High-Performance Centre (HPC) an kal pui - Kalinga Stadium chu Bhubaneswar-ah an din. He hmunah hian kum naupang zawk ten hockey an zir bakah India tan mikhual thlenna hmun ṭha a ni bawk.

Odisha leh Hockey India
2017: Odisha sorkar chuan Hockey India League-ah team a nei, a team Kalinga Lacers chu an champion.
2018: Sahara chu Indian hockey sponsor tu a nihna aṭangin a inhnukdawk.
2018: Hockey India chu kum nga chhung atan vaibelchhe 140 hu inremna a neih pui.
2018: Bhubaneswar-ah Hockey World Cup a thleng.
2019: FIH Men's Series Finals leh Olympic Qualifier an thleng.
2020: FIH Pro League an thleng.
2021: India mipa team-in bronze medal an la, hmeichhe team chu palina an ni.
2023: Hockey World Cup an thleng dawn, khawvela Hockey Stadium lian ber chu Rourkel-ah an sa.