Messi-a'n Barcelona a chhuahsan dawn!

Ningani zan khan Barcelona-in Lionel Messi chhuah tur thu an puang a, khawvel a deng chhuak rang hle. Copa America champion zo hlim leh Ballon d'Or dawng tura rinkai Messi-a'n club a nei lo a, Argentina captain la thei tura hming ri ring ber chu 'sum lama buaina nei lo' Paris Saint-Germain an ni.

Inrem tawh mah se
Barcelona leh Lionel Messi ten July thla laihawl khan a thuphungin inremna an nei a, Messi hian a hlawh chu 50% a ti hniamin kum nga chhung atan contract a ziak ang tih a ni.

Barca president Joan Laporta chuan, "Kan contract zawrh hmasa zawk chu kum hnih hlawh kum ngaa pek tlak a ni a, FPP hnuaiah a theih turah kan ngai. Dan vanga a rem tak loh avangin kum nga chhung atan contract kan zawrh leh a, Messi pawhin rem a ti.

"Kan duh dan tak chuan kum hnih atan a ni a, Messi hian a duh belh a nih chuan kan ngaihtuah ṭha leh ang. Messi tel loa hun hman hi tunah ni loin kum hnih hnua thleng tur atan kan duang. Amaherawhchu La Liga dan leh hrai avangin TV rights aṭanga kan sum lakluh a nghawng dawn a, chu chu kan rem ti thei lo," tiin inremna awm tawh sa an puitlin tak theih loh chhan a sawi.

Catalan club hian an sum dinhmun an thlir a, kum 34 mi Messi hi kum hnih bak contract an zawrh ngam lo. Chutihrualin Messi theihna a san em avangin an theih ang tawka fan an tum a, an hlawhtling ta chuang lo.

Barca dinhmun
La Liga-in Cristiano Ronaldo an chan tawh a, Lionel Messi chan an duh lo. Chutihrualin Messi a nih avangin dan an thlak thei si lo. Covid-19 vanga Barcelona sum dinhmun a chhiat bawk avangin La Liga leh Catalan club duhthusam hi a thleng thei ta lo.

Joan Laporta chuan, "Messi vangin hriatthiam theih kan ni lo a, La Liga aṭanga chhuah ngai mah se dan hnuaiah kan awm vek a ṭul. Ani tel lo pawh hian kan inkhung leng thei hram a ni a, chuvangin Messi belh hi a har tawh. Chona thar hmachhawn ngam a ṭul. Club hi dinhmun derthawnga kan dah a rem lo," tiin thutlukna harsa an siam a ṭul thu a sawi.

Messi chhuah tur thu an sawi ruala thuthang awm chu Barcelona-in an captain an chelh theih nan La Liga an nawr na a nih thu an sawi. Amaherawhchu Laporta thusawi aṭanga thlir chuan Messi hi Catalan club tan a khel tawh dawn lo.

Spanish football expert Guillem Balague pawhin, "Barcelona-in chhuahtir an tum player-ten chhuah an tum lo. Antoine Griezmann, Jordi Alba leh Gerard Pique te an cham dawn. Chumi awmzia chu Messi hian 50% pawhin a hlawh ti hniam se Barca hian an la tlin chuang lo," tiin Messi dinhmun a sawifiah.

Messi hmalam
Spanish chanchinbu El Mundo-in Messi hian a contract hman zawh takah khan kum li chhungin euro maktaduai 555 hlawh angin an ziak a, 50% pawhin a hlawh hi ti hniam se footballer hlawh tam ber a la ni dawn.

Covid-19 vangin Barca sum lakluh a tlahniam a, transfer vela an chetsual nasat avangin ba an ngah. Chutihrualin Catalan club ang thoin club dang an buai a, Messi nena sawizawm Manchester City-in pound maktaduai 100-a Jack Grealish an lakluh tawh bakah Harry Kane lakluh an la tum avangin Argentina captain la thei dinhmunah an ding lo.

Lionel Messi la thei tur awmchhun chu PSG an ni tawh mai a, chutihrualin Messi hi tuna thil thleng pawi ti ber zinga mi a nih avangin club dang ngaihtuah hmain awm hahdam ve phawt a mamawh ang.

Tuna a lan danah chuan Messi-a'n PSG a zawm ang a, Ligue 1 inelna a san tawk loh avangin World Cup atan hahdamna hun ṭha a nei thei dawn. Khawvel player ropui ber zinga mi Messi hi French club zawhah hian United States lama kal leh tura sawi a ni.

Player dang an la si
Messi-a contract an pawhsei theih loh laiin Barcelona-in Sergio Aguero, Memphis Depay, Emerson leh Eric Garcia te an lalut.

Hemi chungchang hi sawi fiahin Laporta chuan, "Kan sum dinhmun hre chungin an hlawh atana kan zawrh te an rem ti a, an chungah hian kan lawm a ni. Heng player-te hlawh leh Messi nena inremna kha chu khaikhin chi rual a ni lo," tiin a sawi.

Barcelona thuchhuak
FC Barcelona-ah Lionel Messi a cham dawn lo.
FC Barcelona leh Lionel Messi ten inremna kan nei a, vawiin lamah contract thar ziah ngei tum ni mah se Spanish La Liga dan leh dun avangin a rem thei ta lo.
Hetiang a nih tak avang hian Messi hi FC Barcelona-ah a cham dawn lo. Club leh player-te chuan kan duh ang kan puitlin thei ta lo hi pawi kan ti hle a ni.
FC Barcelona chuan kan club ropuina rama min thlenpuitu player chungah hian thinlung takin lawmthu kan sawi a, a hmalam hun a mimal nun leh a eizawnnaah duhsakna kan hlan e.