IBA intercontinental title hlawhtu 'Zo Keite'
"NT Lalbiakkima inhnek en hman tur chuan chan fuh a ngai," an ti - a chhan maw? A khingpuite a hneh hma ṭhin lutuk a, inhnek a hmuhnawm hman ṭhin lo!
Nimin khan NT Lalbiakkima chuan IBA intercontinental title a hlawh chhuak a, Siaha boxer hian professional boxing a luhchilh hnua a title hmasa ber hlawh chhuak tur hian Sandeep Singh chu round hnihna lekah technical knockout hmangin a hneh.
NT-a hian December 2020 khan a fight hmasa berah Haryana boxer ṭha Aman chu technical knockout hmangin a lo hneh tawh a, he inhneka hnehna chang tur pawh hian minute khat leh second 25 bak hun a hmang lo!
Zo Keite
Marine Centre, Mumbai-a inhnekah NT-a'n Sandeep Singh a ngam a, a tir aṭangin a nawr nghal - round khatnaah Sandeep a inveng thei viau a, Siaha boxer-in nawr mah se beisei angin inhnek a hmuhnawm tawk thei lo.
Round hnihnaah erawh boxer pahnih inthlauhna a lang. NT-a'n a dan pangngai angin a nawr chhunzawm a, vawi khat phei chu chiang zetin a khingpui hi a hnek thlu - Sandeep-a'n hma taka tlawm duh loin a tho zui.
Mahse, Mumbai khawpuiah boxer pasang zawk Sandeep a ding rei thei lo, NT-a kuttum a dawng hnem hret a, a lu a hai avangin a khel chhunzawm thei lo a, NT-a a chak a, IBA intercontinental title chu a ta a ni ta.
Beisei phak bak
Punjab boxer Sandeep hi Junior leh National Men's boxing champion-ah te pawh medal lo hlawh chhuak tawh a ni a, record a nei ṭha hle - NT-a pawhin a beisei aia hmaa hnehna a chan thu a sawi.
Zo Keite hming lem an pek boxer chuan, "Ka ruahmannaah chuan round li vel thleng ka nawr ang a, ka nawr chauh hnuah knockout tumin ka hnek ang, tih a ni a, ka beisei aia hmain ka chak ta zawk a ni," tiin Vanglaini a hrilh a, NT-a hian inhnek a kham lo!
Mizo boxer chuan a hmachhawp sawi zuiin, "Tunah chuan engmah sawi hona hun a la awm lo a, mahse, kan inhnek zawha ka promoter Devraj Das hnena ka sawi chu a rang thei ang bera inhnek hmachhawn leh nghal a ni," a ti!
Chawl hman kan ni lo!
NT-a'n IBA title a hreng ta a, mahse, inter-continental title chungah world title a la awm avangin tun hi a bul ṭanna chauh a ni. Siaha boxer chuan, "Ka lo haw ang a, rei lote ka chawl hahdam ve ang a, training ka chhunzawm leh nghal ang," a ti a, chawlh rei a tum loh thu Vanglaini a hrilh.
Siaha boxer hian lawmthu sawina tur pawh a ngah. NT-a chuan, "NTP Boxing Team chungah lawmthu ka sawi a, coach Lalmuanpuia leh strengh and conditioning coach Biakzuala (Gte-a) chungah pawh ka lawm em em. Dr. Muanpuia min buaipuina zawng zawng ka rul seng lo. Ka nu Zothanpuii Khawlhring chungah ka lawm em bawk," a ti a, amah ṭanpuitute a hre reng.
NT-a'n hnehna ropui a chan ni hian Tuipui boxer Laldingliana a inlan ve bawk a, LPS pro fight bantamweight champion lai hian a professional fight hmasa berah Vindo Vanteddu chu round khatna lekah a knockout a ni.