Zanin dar 9:45-ah Community Shield : Leicester City Vs Manchester City

English football season khuh hawnna atan hman ṭhin Community Shield chu zanin dar 9:45 hian Wembley Stadium-ah khelh a ni dawn a, Premier League champion Manchester City leh FA Cup champion Leicester City te an inhmachhawn ang.

Man City-in pound maktaduai 100-in Jack Grealish an lalut a, Leicester City-in Patson Daka, Boubakary Soumare leh Ryan Bertrand te an lalut tawh. Community Shield hi friendly match u awrh ni mah se inkhel en a châkawm ta hle.

Community Shield chu
FA Community Shield hi kum 113 kal taa khelh ṭan tawh kha a ni a, tun ṭum hi a vawi 99-na tur a ni. Manchester City hian vawi ruk hnehna an chang tawh a, kum 2012 aṭang khan vawi thum an chak tawh.

Leicester City pawhin kum 1971 khan Community Shield-ah hnehna an chang tawh a, kum 2016 khan Wembley Stadium-ah hian inlan lehin FA Cup champion Manchester United 2-1 in an hneh lo.

Community Shield-ah hian nomawi awm ve bawk mah se manager ṭhenkhat chuan chak tum thoin Premier League atana inzir nan an hmang ṭhin. Chutihrualin City leh Foxes hi season tharah pawh champion tura rinkai leh Champions League khelh inbeisei an nih leh dawn avangin en a châkawm tawh hle.

En châkawm Mahrez
Man City hian season thar atana inpuahchah nan match thum an khel tawh a, Preston (2-0), Barnsley (4-0) leh Blackpool (4-1) in an hneh. Inkhel pathumah Riyad Mahrez-a'n goal a khung vek a, Algeria international hian nipui chawlh a hman ṭhat bawk avangin a club hlui Foxes tan ven uluk a ṭul ang.

Euro C'ship khel player-te an let tawh a, Copa America-a inlan Brazil keeper Ederson erawh a inlan a rinawm loh zawk. United States number 1 keeper Zack Steffen a inlan a rinawm a, Fernandinho erawh friendly match-ah a inlan tawh a, Foxes lakah hmun pawimawh a chan a rinawm.

Manager Pep Guardiola-a'n thutlukna huaisen a siam ṭhin a, Community Shield-ah academy player tan khelh hun a siamsak a nih pawhin a mak lo ang. Mahrez ang bawka friendly match vawi thuma goal khung vek thei kum 18 mi Samuel Edozie hi lo chhinchhiah lawk a ṭha nag.

Engtin zel?
Manchester City player thar Jack Grealish hi mit fukna tur a ni a, Pep Guardiola chhawr dan tur hriat a châkawm takzet. Grealish hian Sergio Aguero kalsan jersey number 10 a ha dawn a, Argentine forward hmunruak a luah dawn tihna erawh a ni lo.

Pep-a'n Gabriel Jesus tih loh chu forward pangngai a nei lo a, tunah Harry Kane nen sawizawm an ni mek. Leicester City nena an khelh dan a zirin Man City-in player an lalutin an hralh chhuah a rinawm a, player langsar dang an lalut dawn a nih chuan player ṭhenkhat an chhuahtir a ṭul ngei ang.

Leicester City-in hliam vangin Wesley Fofana an chhawr thei dawn lo a, chutihrualin Brendan Rodgers an kawl miau avangin dah hniam theih an ni lo. Foxes tan Jamie Vardy a pawimawh leh dawn a, player thar Patson Daka hmuh a châkawm. Arsenal nena sawi zawm James Maddison pawh friendly match-a Villarreal an hneh ṭumin a pawimawh a, transfer thuthang vangin a buai lo.