Man City-in British record-in Grealish an la

Manchester City chuan England midfielder Jack Grealish chu pound maktaduai 100-in an lalut. Kum 25 mi Grealish hian Premier League champion tan kum ruk daih contract a ziak a, Sergio Aguero kalsan jersey no. 10 a ha ang.

Grealish a man hian Manchester United-in kum 2016-a Juventus aṭanga Paul Pogba an lakluhna pound maktaduai 89 a khum a, British transfer record thar a nih bakah khawvela footballer manto ber pakuana a ni pha bawk.

£100m a tam tawk lo
Aston Villa-in an fachuam Jack Grealish hi an dah pawimawh a, September 2020 khan contract thar a ziak. Hetah hian Aston Villa-in Champions League an khel phak lo a, UCL khel club-in an dawr a nih chuan release clause atan pound maktaduai 100 an dah.

Villa chief executive Christian Purslow chuan, "Release clause atana pound maktaduai 100 kan dah hian British footballer manto ber a nih theih dawn bakah Premier League club-in player a leina man to ber a ni dawn. Hetiang zat kan chhiar chan hi Aston Villa tan a hlutzia lantir a ni a, amah duhtute awlsam taka hnar theihna turah kan ngai bawk. A tawpah erawh chuan Champions League khelh a duh thlu ngang a, kan chelh thei ta lo," tiin Grealish an dah sanzia a sawi.

Purslow chuan sawi chhunzawmin, "Tun hun hi a thlen theih kan ring a, Jack-a hi mi pakhata thlak theih kan beisei lo. Chuvangin a theihna hrang hranga hi kan hrechiang a; chance a siam thiamna te, ṭhiante a siamsak thiamna te leh goal a khung theihna te hi player pakhata thlak tum loin pathuma thlak ka tum," tiin a sawi.

Villa hian nipui bazarah Emi Buendia, Danny Ings leh Leon Bailey te an lalut a, Grealish awm tawh lo mah se season tharah Europe inelnaa tel an beisei ang. Chutihrualin an captain Grealish erawh a chelh nan pound maktaduai 100 release clause an siamsak a, a tam tawk lo.

Grealish chu
Grealish hi a naupan lai aṭanga Aston Villa ṭantu a ni a, kum ruk a nihin a club ṭan ber hi a zawm. English midfielder hian Villa tan inelna hrang hrangah match 213 a khelhsak a, goal 32 a khung. Statistics hian Villa tana a hlutzia a pho chhuak zo lo.

Kum 25 mi Grealish chuan, "Ka hun puma Villa ṭantu ka nih avangin ka tan chuan hun harsa tak a ni. Pep Guardiola nen kan inbia a, an player neih dan kan hria. A tawpah chuan nomawi beisei pha team chu ka hnar thei ngang lo a ni.

"Champions League ka la khel ngai lo a, ka châk takzet. Thawhlehni leh Nilaini zana inkhel loa ka ṭhut hian ka khel châk ṭhin hle. Manager nena kan inbiak khan kan lung a awi a, team a khelhtir dan hi ka duh zawng tak a ni," tiin Man City a zawm chhan a sawi.

City director of football Txiki Begiristain chuan, "Tun hnaia club leh ram tana Jack-a hmasawnna hi hmuh hmaih theih a ni lo. Pianpui thiamna nei a ni a, hmasawn duh mi a nih bakah tun dinhmuna attacking player hmuhnawm ber zinga mi a ni bawk," tiin a sawi.