Rossi-a'n MotoGP chawlhsan dawn

Valentino Rossi chuan MotoGP season kal lai a zawh hunah intlansiak a chawlhsan tur thu a sawi, Italian rider kum 42 mi hi season tharah chuan bike inelna sang berah a hmel kan hmu dawn tawh lo tihna a ni.

Italian tlangval hian kum 25 chhung zet chu bike intlansiak khawvel hi a lo chamchilh tawh. Inelna huang hrang hrang - 125cc, 250cc, 500cc leh MotoGP-ah te a hlawhtling vek, ani anga hlawhtling vek thei hi an awm ve lo.

Inelna sang ber MotoGP bikah vawi sarih champion Rossi chuan, "Season tharah ka intlansiak ve dawn tawh lo tih sawi hi a harsain a hrehawm ka ti hle. Hetiang thu sawi tur hian hun rei tak chhung chu ka lo inngaihtuah tawh a ni," tiin a sawi.

A vanglai a liam tawh a, title a lak hnuhnung ber chu 2009 kha niin a hnu lamah chuan ṭum hnih pahnihna dinhmun a luah; 2014 khan Marc Marquez a tluk lo a, 2015 khan Jorge Lorenzo hnungah a awm bawk.

Petronas Yamaha SRT rider chuan, "World Championship-ah kum 26 chhung ka awm a ni a, ropui ka ti hle. Zinkawng ngaihnawm leh thui tak ka zawhte kha ka ngai hlu. Nakkum chu ka tan chona thar a ni tawh ang," a ti.

Bike intlansiakna sang ber season kal laiah inelna vawi kua an nei tawh. Pathianni tlai dar 5:30 hian Styrian Grand Prix an tlan leh ang.