Match hnihnaah Nadal chak lo

Rafael Nadal chuan beisei angin hard court season bul a ṭan fuh lo. Spanish tlangval hi Citi Open khelh laia a match hnihnaah a chak lo, nimin zing khan Lloyd Harris lakah 6-4, 1-6, 6-4 in a tlawm.

Grand Slam vawi 20 champion tawh Nadal hian a match hmasa zawkah pawh set a hloh. World number 50 lakah hian set hmasa a hloh hnuah la let mah se, set hnuhnung berah a service a hum theih loh avangin a zinkawng a tawp.

Harris-a'n vawi 16 ngawt aces a siam thei, hetih lai hian Nadal erawhin ṭum riat bak a vaw chhuak thei lo. Nadal tan hard court-a hlawhtling tur chuan service siamṭhat a mamawh, insiamṭha turin theihna erawh a nei.

World number 3 Nadal chuan, "Zep tur a awm lo, ka service kha a ṭha tawk lo a ni. Game hnuhnung lam kha ka khel chhe hle bawk, hun rei lote chhunga insiamṭhat nghal ka tum ang," tiin a sawi.

Nadal hi French Open hnua a inkhelh lehna hmasa ber a ni a, a taksa lamah harsatna nei lo mah se match a khel tlem tih a hiat. A ṭhatna ang taka khel chhuak leh tur chuan tournament khelh tam a mamawh.

Inkhel dangah Jannik Sinner chuan Sebastian Korda 7-6 (3), 7-6 (3) in a hneh a, seeded pahnihna Felix Auger-Aliassime chu California tlangval Jenson Brooksby lakah 6-3, 6-4 in a chak lo ve bawk.