A bul ṭan fuh a ngai - Poch

Paris Saint-Germain manager Mauricio Pochet-tino chuan Ligue 1 season bul an ṭan fuh a ngaih tur thu a sawi. PSG hian zanin dar 12:30 hian an league match hmasa ber atan Troyes an lenchilh ang.

Season hmasa khan PSG hian club dang aiin season an ṭan tlai bik - a kum hmasa lama Champions League final an khelh vang a ni. Hnawhsarum takin bul an ṭan a, result a ṭhat tawk loh avangin manager Thomas Tuchel an ban phah hial.

Argentine manager Poch an neih hnuah pawh PSG hian Lille an tluk thei ta chuang lo. Tun season khuhhawnna French Super Cup-ah pawh Lille hi an ngam lo, an tan ngaihṭha taka awm ngawt theih a ni lo ang.

PSG manager Poch chuan, "Engmah hi thil chiang a awm lo, tu pawh mai hi chesual thei vek kan ni. A tir aṭanga a tawp thlengin kal mar theih a ngai a, chumi tur chuan a bul ṭan fuh kan tum ang," tiin a sawi.