Brazil an champion nawn dawn?

Vawiin tlai dar 5:00 hian Tokyo Olympic mipa football final khelh a ni dawn. Champion lai Brazil leh gold medal dawng tura rinkai Spain ten a thiam ber nih an inchuh ang.

Brazil hian Rio khawpuiah gold medal an dawng tawh a, tun ṭumah hian tawnhriat nei ṭha Dani Alves hoin hlawhtlin leh an tum - a zawna champion erawh thil awlsam a ni dawn lo.

Great Britain (1908, 1912), Uruguay (1924, 1928), Hungary (1964, 1968) leh Argentina (2004, 2008) ten a zawnin Olympic gold medal hi an lo la tawh ṭhin, South American ram hian sulhnu ṭha ziah theihna remchang an nei mek.

Spain tan tun inelna bika goal nga khung tawh Richarlison chu ven ngun a ngai dawn. Everton forward hi goal hmaah a hriam hle. La Roja pawhin Barcelona midfieder Pedri leh Real Madrid duhlai Marco Asensio te an nei ve tho, inkhel a hmuhnawm ang.