Real-in Jovic chhuahtir an duh, a chhuak duh lo!

Luka Jovic chu Real Madrid-in chhuahtir duh mah se Serbian striker hian chhuah a la duh lo nia sawi a ni a, kum 23 mi striker hian Carlo Ancelotti hnuaiah a theihna tak tak pholan theih a beisei.

Jovic hian June 2019 khan Real Madrid hi euro maktaduai 60 bawr velin a zawm a, hetihlaia Eintracht Frankfurt striker hi Barcelona, Chelsea leh Bayern Munich te pawn rim ve hman mah se Real-a kal a thlang.

Mahse, Jovic hian Real-ah a beisei angin hmun a chang tam tawk lo a, season khat leh a chanve a khelh chhungin match 32-ah goal hnih chiah a khung.

January thla khan a club hlui Frankfurt lamah loan-a kirtir a ni a, Bundesliga club tan hian league match 18 khelin goal li chiah a khung - Real a pan hma season-a match 48 aṭanga goal 27 khung thei striker hian ngai a la awh leh lo.

Mahse, Jovic hian Real-ah a khel tam tawk loh avanga form loah a inngai - Real tan match 32 khel tling mah se a minute khelh zat belhkhawm hi 1,014 minute a ni a, match khatah minute 30 ang zel bak a tling lo.

Real hian Jovic hi an hralh thei a nih erawh chuan a tam berah euro maktaduai 20 bak beisei a fuh lo mai thei a, Spanish club tan chuan Ancelotti hnuaia season khat tal enchhin leh phawt hi a sual lo ang.

Jovic hi Inter Milan chuan an thlithlai ve bawk nia sawi a ni a, Serie A club hian an striker chhuanvawr Romelu Lukaku an chan tak hlauha a aiawh tur an ngaihven ve reng niin khawthlang media-te chuan an tarlang.

Inter Milan hian Lukaku chelh an tum avangin pound maktaduai 85 leh Marcos Alonso pek tel huama Chelsea dawrna chu an lo hnar tawh a, sum tam zawk nena an lan nawn erawh chuan sum vanga talbuai team hi an ṭang rei thei kher lo mai thei.

Hetihlai hian Real player zingah Take Kubo, Jesus Vallejo, Dani Ceballos leh Isco te chu chhuak mai thei dinhmuna ding reng an ni bawk.

Real Madrid hian Pathianni zan dar 10:00-ah AC Milan nen friendly match an khel dawn a, August 14 zan dar 1:30-ah Alaves nen inkhelin an league zinkawng an zawh ṭan bawk ang.