Celtic-in Europa League beiseina an nei

Scottish club Celtic chuan tun season-a a vawi khat nan hnehna an chang ve ta a, Europa League qualifying third round-ah FK Jablonec chu 4-2 in an hneh.

Celtic hian Champions League second qualifying round khelin season bul an ṭan a, mahse, Danish club Midtjylland lakah 2-1 a tlawmin an bul ṭannaah an beiseina a tawp nghal.

Beiseina sang tak nen Scottish Premiership bul an ṭan zui a, an mikhualna ramah 2-1 in Hearts an ngam lo - Ningani zanah erawh Celtic an chak ve ta a, Europa League playoff an mitthla.

Celtic tan Liel Abada, Kyogo Furuhashi , James Forrest leh Ryan Christie ten goal khat ṭheuh an khung a, mualneitu team tana Vaclav Pilar leh Tomas Malinsky goal khung chu Jablonec tana beiseina siamtu a ni.

Czech club Jablonec hian August 12 zanah second leg an khel leh ang a, team pahnih inkhel pahnih belhkhawma chak zawk hian group stage lut tur zawnna playoff round an lut leh dawn a ni.

Coach thar Ange Postecoglou hnuaia indinthar tum mek Celtic hian Pathianni zan dar 7:30-ah league match khel turin Dundee FC an mikhual ang a, an elpui Rangers chuan zanin tlai dar 5:00-ah Dundee United an lenchilh thung ang.