India tana gold MEDAL latu Neeraj Chopra

India-in athletics huangah Olympic gold medal a la thei ngai lo, record duhawm lo tak chu Inrinni khan Neeraj Chopra hmangin thai chhiat a ni ta. Kum 23 mi Chopra hian Javelin Throw (Fei khawh) huangah 87.58m a thui khawhin gold medal a la.

Olympic-ah India tan mimala gold medal la thei hmasa ber chu Abhinav Bindra a ni a, Beijing 2008-ah khan 10m Air Rifle-ah gold medal a la. Kum 13 hnuah Neeraj-a'n India tan gold a rawn la leh a, Indian zinga mimal gold la thei pahnihna chauh a ni.

Kum 100 hnuah
India hi kum 1900 aṭang khan Olympic-ah a tel ṭan a, kum 100 tehmeuh hnuah pawh athletics-ah gold medal lak a nei lo. Norman Pritchard chuan kum 1900 hian silver medal pahnih a hlawh chhuak a, British rorelna hnuaia India a kun lai a ni.

India inchhuanna awmchhun chu hockey a ni a, Olympic-a gold medal 10 a lak tawh zinga pariat hi mipa hockey team-te lak a ni a, hetah pawh hian 1980 Moscow hnuah a la leh tawh lo.

Athletics-ah India-in medal a beisei ve tawh ṭhin a; tlan chak hmingthang Milkha Singh leh PT Usha te meuh pawhin medal an hlawh chhuak thei lo. India-in kum 120 tehmeuh a nghah hnuah Neeraj Chopra a rawn lang a, Haryana tlangval hian 87.58m zet khawhin chiang takin pakhatna a ni.

Neeraj hian qualifying-ah 86.65m a khawh a, final round-ah che ṭha hretin 87.58m a khawh. Czech Republic mi pahnih Jakub Vadlejch leh Vitezslav Vesely ten 86.67m leh 85.44m an khawh a, silver leh bronze an la.

Tu nge Neeraj?

Athletes te hi chuan hlawhtlinna vawrtawp an chan hma hi chuan hriat an hlawh tawk ṭhin lo a, Neeraj Chopra pawh hi Olympic gold medal a lak hmain record ṭha tak a nei tawh hrim hrim.

Kum 2016 daih tawh khan 86.48m khawhin world junior record chelhtu a ni a, kumin khan 88.07m khawh lehin national record chelhtu a ni bawk. Neeraj hian

South Asian Games 2016, World U-20 Athletics C'ships 2016, Asian Athletics C'ships 2017, Commonwealth Games 2018 leh Asian Games 2018-ah te gold a la tawh a ni.

Neeraj hi Haryana thingtlang khua Kandra, Haryana-a piang a ni a, a pa hi lo neitu niin athletics tih ṭan chhan hi a rihna tih hniam a duh vang a ni. Kandra hi Panipat bula awm a ni a, ṭum khat chu a patean Shivaji Stadium, Panipat-ah tlan turin a hruai a, mahse hetah javelin throw an training lai chu hmuin a ngaina nghal.

Under 20 World Cup-a gold medal a lak ṭuma a coach, Australian mi Gary Calvert chuan, "A pianpui a ni," tiin a sawi. Javelin lam hrechiangte chuan Neeraj hian Paris 2024 aṭangin Oympic-ah medal a la ṭan ang, tia an sawi lawkna chu 4 Rajputana Rifles, Indian Amry-a subedar hna chelhtu chuan an beisei aia hmaah a ti hlawhtling.

Hlawhtlinna
• Gold Medal, Asian Games 2018
• Gold Medal, Commonwealth Games 2018
• Gold Medal, Asian Athletics Championships 2017
• Gold Medal, World U-20 Athletics Championships 2016
• Gold Medal, South Asian Games 2016
• Silver Medal, Asian Junior Championships 2016
• National Record chelhtu ni lai (88.07m 2021)
• World Junior Record chelhtu ni lai (86.48m 2016)

Sumin an vur

Sorkar laipui leh state sorkarin Olympic-a tel pha infiammite hnenah sum a tiam ṭhin a, gold medal meuh la pha hnenah chuan mimal leh pawl inphal an tam hle. He thuziah lai thlenga Neeraj Chopra sum dawn tur belhkhawm ringawt pawh India pawisa chuan tluklehdingawn 12.75 a tling.

Sum bakah hian Haryana sorkar chuan hna ṭha tak an pe dawn a, athletics centre atan ram an pe dawn. Indigo chuan kum khat chhung a thlawna an thlawtheihnaah chhuah theihnna an pe a, Mahindra and Mahindra chuan an motor thar tlangzarh tur Mahindra XUV 700 an pe dawn bawk. Motor hi nuai 25 man bawr vel tur a ni.