Tokyo 2020 - India infiammite an chet ṭhat ber ṭum

Tokyo Olympic chuan India infiamna tan chanchin ṭha bik a her chhuah pui. Kum 1920 aṭangin India-in Olympic a lo hmachhawn tawh a, tun ṭum hi inelna vawi khata medal a hlawh chhuah tam ber ṭum a ni.

Tokyo 2020-ah hian India-in gold medal pakhat, silver medal pahnih leh bronze medal pali, a vaiin medal pasarih an hlawh chhuak.

MIRABAI CHANU Silver Medal
Pianni 8 August 1994 (kum 27)
Pianna Nongpok Kakching, Imphal
San zawng 4ft 11in
Rih zawng 49kg
Inelna: Weightlifting

Manipur nula Mirabai Chanu chuan kum 21 chhung zet India-in weightlifting huanga medal a lo nghah tawh chu a takah a chantir. Mirabai-i hi 49kg huangah inlanin, silver medal la tur hian (87kg+115kg) total-ah 202kg a chawi.
Nongpok Kakching thingtlanga piang hian tun hma chuan archer (thal kap thiam) nih a tum ṭhin, mahse a tira a tum lohna kawng zawkah khawvel hriat a hlawh - 2017 khan world champion a lo ni tawh bawk.

RAVI DAHIYA (Silver Medal)
Pianni 12 December 1997 (kum 23)
Pianna Nahri, Haryana
San zawng 5ft 7in
Rih zawng 57kg
Inelna: Freestyle wrestling

Harsatna lian tham nei loin Ravi Dahiya-a'n final a lut, 57kg freestyle-ah hian champion ngei tura rinkai pawh a ni. Mahse, gold medal inchuhnaah vanduaiin silver medal-ah a lungawi a ngai.
An chenna aṭanga 60km vela hlaah training a nei ṭhin, hetah hian a pa Rakesh Kumar chuan a fapa hi bawnghnute leh butter a va pe vang vang ṭhin, a taksa ti chak turin ei tur ṭha a duhsak vang a ni.

PV Sindhu (Bronze Medal)
Pianni 5 July 1995
(kum 26)
Pianna Hyderabad,
Andhra Pradesh
San zawng 5ft 10in
Rih zawng 65kg
Inelna: Badminton

Badminton world champion ni chungin Tokyo Olympic a hmachhawn a, a lakah beiseina pawh a sang. Mahse semifinal-ah world number 1 Tai Tzu Ying a ngam lo, pathumna inchuhnaah erawh harsa lo takin a chak.
Hyderabad nula hian Rio Olympic-ah khan silver medal a lo vaw chhuak tawh bawk. India infiammi zinah Olympic medal pakhat aia tam la thei hmasa ber a ni hial.

Lovlina Borgohain (Bronze Medal)
Pianni 2 October 1997 (kum 23)
Pianna Baromukhia,Assam
San zawng 5ft 10in
Rih zawng 69kg
Inelna Amateur boxing

Olympic a hmachhawn hmasak berah Lovlina Borgohain chuan medal a hlawh chhuak nghal. Tokyo 2020 bikah Indian boxer zinga medal la thei awmchhun a nih avangin a hming hi hriatreng a ni tawh ang.
Kum 23 mi Borgohain hian a hma chuan a unau pahnihte angin kick boxing a khel ṭhin, a hnu lamah erawh boxing lamah a inlet. World championhsip leh Asian Championship lamah bronze medal a lo la tawh bawk.

BAJRANG PUNIA (Bronze Medal)
Pianni 26 February 1994
(kum 27)
Pianna Khudan, Haryana,
san zawng 5ft 5in
Rih zawng 65kg
Inelna Wrestling

Indian wrestler zinga Olympic gold medal dawng hmasa ber nih tumin Japan a pan a, a duh ber ti hlawhtling ta chiah lo mah se bronze medal a dawng pawh hi lawmna tham a ni.
Infiamna ngaina chhungkua aṭanga seilian a ni a, an unau leh a pa thlengin inchai an ngaina vek. Kum naupang te a nih lai aṭangin tlangval ho inchaina kiangah a awm ve ṭhin - Asian Games leh Commonwealth Games-ah pakhatna a ni tawh.

HOCKEY TEAM - Bronze Medal
Assocaition Hockey India
Coach Graham Reid
Manager Shivendra Singh
Captain Manpreet Singh
Current Ranking Number 3

Kum 41 a liam hnuah India mipa hockey team chuan Olympic medal an hlawh chhuak ve leh ta, final lut zo lo mah se pathumna inchuhna inkhelah India hian Germany chu 5-4 in an hneh.
India tlangval te hian 1928, 1932, 1936, 1948, 1952, 1956, 1964 leh 1980 te khan Olympic gold medal an lo dawng tawh, infiamna khawmpui lian hi vawi 21 zet an hmachhawn tawhna niin India-in medal a la hnem tawhna ber a ni.