Mangṭha Tokyo 2020: Paris 2024-ah inhmu leh ang aw
Buaina leh harsatna hrang hrang leng vel karah Tokyo Olympic 2020 chu an zo fel ta. United States chuan a pumpuiah gold medal 39 lain pakhatna an ni leh a, pahnihna chu gold medal 38 latu China an ni.
Nimin tlaia kharna hun hmanah International Olympic Committee (IOC) president Thomas Bach chuan, inelna neih lehna tur Paris mayor Anne Hidalgo hnenah Olympic puanzar a hlan chhawng - kum thum a liam hnuah Paris khawpuiah kan in hmu leh dawn nia ti chungin an in mangṭha.
Tokyo 2020
Infiamna khawmpui lian hi a sum che vel a tam, tun ṭuma an budget pawh US dollar tluklehdingawn 15.5 lai a ni. Hun rei tak chhung inbuatsaih ngai a nih avangin a thlengtu tur hi an ruat lawk hma thei hle. Japan khawpuiin a thlen tur thu pawh hi 2013 September 7 khan tih chian a ni tawh.
Japan hian Olympic Village siamin nasa takin a inbuatsaih, mahse inbuatsaihna vawr tawp thlen lai takin Covid-19 vangin khawvel a buai a, thil engkim mai chu a chiang lo zo ta vek mai si - Tokyo 2020 pawh kum khata sawn tlai a ngai hial.
Hri leng a reh thei lo a, a thlengtu ram mipui lamin sawn emaw ṭhulh mai emaw an duh. Mahse, IOC lamin a hun an sawn thei tawh lo - Japan sorkar pawhin an thutlukna sawh sawn loin an thleng tlang, kumina neih ni mah se a hming erawh Tokyo 2020 an ti tlang.
US an chungnung
Inelna hmachhawn turin khawvel ram hrang hrang 205 zet an pungkhawm, infiammi 11,090 chuang niin infiamna peng hrang 33-ah an inel. Ram hrang 93 ten medal an la thei a, India chu a pumpuiah 48-na dinhmun lauhtu a ni.
Olympic a nih tawh chuan US hi chungnung ber tura ngaih an ni ṭhin, kuminah erawh a awlsam bik lo. Nimin zing thleng khan China chuan US aiin gold medal pakhatin an la hnem zawk - mahse US hian hmeichhe volleyball leh basketball hmanga gold medal la lehin an lehthal.
Rio Olympic (46 gold medal) nena khaikhin chuan US hian Tokyo 2020 an hmang ṭha tawk lo. Chutih rualin Asia rama inelna neih a nih avangin an tan thil a awlsam lo, Paris khawpui lamah chuan China nen hian nasa zawkin an inel a rinawm.
