Messi-a'n mittui nen Nou Camp chhuahsan

Nimin chawhnu khan Lionel Messi-a'n Nou Camp-ah thuthar thehdarhtute hmaah Barcelona thlahna thu a sawi a, kum 34 mi Messi hi insum zo loin an mittui a tla.

Messi hian December 14, 2000 khan Catalan club hi a zawm a, La Liga-in salary cap an siam avangin kum 21 hnuah Barcelona hi a chhuahsan dawn.

Argentina captain Messi hian kumin July 1 aṭang khan club a nei lo a, French club Paris Saint Germain a zawm tura ngaih a ni.

Messi an kawmna kimchang

Hun duhawm ber?
Pakhat chauh thlan chu har a, ka tan chuan club tana ka khelh hmasak ber kha a hlu. Kha tah khan ka tum ram ka ti hlawhtling. Khami hnu khan thil ropui tak tak a thleng a, mahse ka bul ṭanna kha ka hre reng ang.

Contract ziah thar ziah i ring em?
Laporte sawi ang kha a ni a, engkim pawm vek tawh a ni. Mahse a tawp khawkah a hlawhtling thei ta lo. Kumin chhungin ka chanchin vawi tam an sawi a, thudik chu cham ka duh a, ka thei ta lo. Nikum kha chuan chhuah ka duh a, keimah ngei pawhin ka sawi.

Kuminah erawh cham ka duh a, ka cham theih dan tur ka theihna zawng zawngin hma ka la, mahse La Liga vangin ka thei ta lo. Kan pawm mai a ṭul a, chona thar kan hmachhawn a ṭul a ni.

Barca-in chelh an tum tak tak chein i hria em?
Ka hre bik lo. Ka hriat chinah chuan an theihna zawng zawng an chhuah. Keima lam aṭang chuan ka cham theih nan theihtawp ka chhuah.

Eng nge harsa ber?
Ka rilruah thil tam tak a rawn lut a, dawn sawn thiam a har. Kum 16 chhung first team tan ka khel a, a bul aṭanga ṭan ṭhat hi ka tan a har a, ka chhungte tan a har leh zual ang. Kan hmaa thil thleng turah kan insiamrem theih ngei ka ring a, kan pawm a ṭul.

PSG a mi i zawm dawn?
Thil theih a ni a, chutihrualin tun thleng chuan eng club nen mah thutlukna kan la siam lo. Club hrang hrang aṭangin sawmna a rawn lut. Engmah tih chian a awm lo a, PSG nen erawh kan inbe ngei e.

Club tan eng nge i hnutchhiah?
Club hlutna hre tura hruai len ka ni a, chutiang chuan min hre zui se ka duh. Chutihrualin an duh angin tute pawhin min hre zui thei ang. Nomawi tam tak kan chawi a, chak loh ṭum kan nei bawk. Kan lungaih ni aiin kan lawm ni a tam zawk.

I hun harsa ber?
Ngaihtuah buai ngai loin tun hi ka hun harsa ber chu a ni. Khelmualah chuan rilru na taka chak loh ṭum mah se khelmualah vek phuba a lak theih. Tunah erawh a kir theih a ni tawh lo.

Ka club hmangaih chhuahsan a ṭul avangin ka rilru a na a, hetiang hi a thlen ka ring lo. Engtik lai pawhin thudik ka sawi. Nikum khan chhuah ka duh a, tunah chuan chhuah ka duh lo.

I tel loa Barca awm dan tur hi?
Squad ṭha tak an nei a, player thar an lut ang. Player chu an lut a, an chhuak leh ṭhin. Laporta sawi angin club hi mimal aiin a pawimawh zawk. A tirah chuan a mak deuh mai thei a, mahse ngaiah an nei thuai ang.

Thudik tak chu hei hi a ni, inthlan zawh khan president thar nen chhun chaw kan ei dun a, kan thil ei zawh chuan cham turin thutlukna ka siam. Khatihlai khan contract kha buaina a ni lo a, tunah erawh thil theih a ni lo.

La Liga president Javier Tebas khan a theihna zawng zawng a chhuah thu a sawi a, a bulah eng nge sawi duh i neih?
Club nena kan inrem theih loh chhan hi La Liga vang a ni a, club leiba ngah vang leh club-in leiba neih belh an duh loh vang a ni.

A bulah sawi duh pakhatmah ka nei lo a, amah nen kan inkarah buaina a awm lo.

Xavi leh Iniesta te hmun hla takah an kal. Nang erawh Barcelona hmachhawn thei dinhmunah i ding?
Ka bul hnaia awmte chuan ka zia an hria a, chak zel ka duh. Ka inkhelh tawp ber thlengin nomawi lak ka duh ang. Dani Alves ka lawmpui a, chutihrualin amah aia nomawi chawi tam ka duh, ka hnaih tawh viau a ni.

Ibiza-ah PSG player-te nena thla in la ho?
Tum reng vang a ni lo. Paredes leh Di Maria te ka hmu a, Neymar-a'n min lo bia a, a bula kal turin min sawm. Paredes leh Di Maria an awm thu ka hrilh a, Neymar chuan kan vaia a bula kal turin mi ngen. Thla kan la ho a, PSG-a kal turin min sawm a, kan infiam zui.

Cham turin thil danglam tih i nei em? Player thar nen hian nomawi beisei em?
Ka theihna zawng zawng ka chhuah tawh a, tih theih dang ka nei tawh lo. Player tharte nen hian UCL champion leh a châkawm a, mahse a theih ta si loh.

Barca cham theih nan hlawh tih hniam i thei em nge a theih tawh loh hrim hrim?
Ka hlawh hi 50% in ka tihniam a, kan pawm. Tumahin tih hniam belh turin min ngen tawh lo.

Bumtu che an awmah i ngai em?
Theihtawp kan chhuah vek a, a theih loh a ni. Fans bulah ka lang tlang a, dawt ka sawi ngai lo. Ṭawng chhuah loh chuan kan chanchin nasa takin an ziak a, thudik lo tam tak a awm.