Olympic mipa football thiam ber Brazil

Khawvel infiamna khawmpui lian ber Olympic football-ah Brazil an ropui chhunzawm zel a, champion lai team hian rawlthar ṭha an neih belh zel tih pholangin football-ah gold medal an la leh ta.

Nissan Stadium-a inkhelah Brazil hian 2-1 in Spain an hneh a, kum nga liam taa an ram ngeia an lo hlawhchhuah tawh Olympic mipa football gold chu an hlawh chhuak nawn.

Brazil tan Matheus Cunha leh Malcom ten goal an khung a, Spain tan Euro 2020-ah pawh feh chhuak Mikel Oyarzabal chuan goal khat khung ve mah se awmzia erawh a nei phak lo.

Brazil an ṭha
Olympic gold inchuhna inkhelah Spain-in ball chang tam zawk mah se team hlauhawm zawk erawh Brazil an ni a, Richarlison-a'n penalty khung ngat se goal tam zawka chak thei an ni - Everton forward hian crossbar a tihper bawk.

Richarlison-a'n penalty a hlah hi minute 38-na a ni a, mahse, an vanduai reng lo - first half hun pek belhah Matheus Cunha chuan Brazil hmahruaina goal a rawn khung. Kum 22 mi forward hi Bundesliga club Hertha BSC tana khel a ni a, season hmasa khan match 28-ah goal riat a khungsak.

Spain-in si phur zawk nih reng erawh an tum lo. Minute 61-naah Mikel Oyarzabal chuan volley hmangin si phurh sutna a rawn khung a, Real Sociedad forward goal khung zarah Spain-in beiseina an nei.

A hming Malcom
Hun pangngaiah team pahnihin goal an khung tawh lo a, extra time khelh a ni - Brazil coach André Jardine-a'n thutlukna a siam fuh a, minute 90-naa bench aṭanga a luhtir Malcom chuan gold a hlawh chhuahsak.

Kum 2018-a AS Roma zawm tura ngaih a nih tawh hnua Barcelona zawmtu, Russian club Zenit Saint Petersburg-a khel ta forward hian minute 108-naah chakna goal a khung a, Spain-in an chhanglet tawh lo.

Spain tan hian Tottenham Hotspur player thar Bryan Gil chuan extra time khelh hmain a team chakpuina remchang a nei a, mahse, hla tak aṭanga a goal shot ṭha tak chuan woodwork a per.

Beisei phak lo Spain
Kum 1992 champion Spain-in inelna ṭan a nih hma khan rin an hlawh a, Euro 2020 khel team aṭanga player an kawl nual avangin a awm lo hran lo a, beiseina a sang hi a mak lo.

He Spain team-ah hian RB Leipzig forward Dani Olmo, Barcelona player Pedri leh Eric Garcia, Villarreal defender Pau Torres leh Athletic Bilbao goalkeeper Unai Simon te ho an awm.

Mahse, Spain-in senior team tana khel phak player an kawl nual chungin final an lut hram a, final-ah meuh chuan vanneihnain a tlin tak bik loh avangin silver-a an lungawi a ṭul.

Alves a ropui
Olympic mipa football hi Under 23 player-te inelna a ni a, mahse, kum 23 chung lam player pathum an tel phalsak an ni ṭhin thung - kuminah hian kum 2020-a neih tur inelna chu Covid-19 vanga sawn tlai a nih avangin kum 24 chin an tel phalsak a ni.

Kum 38 mi Dani Alves chu Brazil tan kum upa 'quota' in a khel ve a, Barcelona defender hi kum 40 hnaih tawh lamah pawh a la rintlakin rawlthar rual zingah a tha a la ṭhum bik lo. Captain armband hrengin team tan player pawimawh a ni a, a kalna apiangah a champion zel a ni ber.

Brazil hian London 2012-ah khan silver an la a, Mexico lakah 2-1 in an tlawm. Rio 2016 khan final lut nawn lehin Neymar leh a ṭhianten penalty-a Germany hnehin gold an la a, kuminah gold bawkin an chhunzawm leh ta.