Man United an chak; Sancho a la inlan lo

Manchester United chuan Inrinni zan khan Old Trafford-ah Everton 4-0 in an sawp a, friendly match-ah hian Mason Greenwood (8'), Harry Maguire (15'), Bruno Fernandes (29') leh Diogo Dalot (90+2') ten goal

an khung.

Man United player thar Jadon Sancho chu squad-ah a la awm lo a, chutihrualin Sancho leh Real Madrid aṭanga English club zawm tur Raphael Varane ten TV aṭangin an thlir thung.

Old Trafford-a inkhel hi a hmunah entu 55,000 zet an pung khawm a, goalkeeper Jordan Pickford tihsual zarah Greenwood-a'n hma takah a khung. Captain Maguire-a'n minute 15-naah Luke Shaw corner pet chu a tauh lut a, Fernandes-a'n freekick aṭangin mawi takin a khung.

Injury time-ah substitute Fred-a vawrhluh chu bench aṭanga lut ve tho Dalot-a'n mawi takin a tauh lut a, Rafael Benitez kaihhruai Everton lakah Man United an chungnung hle.

Toffees ṭantute zingah Liverpool manager hlui Benitez hi a tla na tawk lo a, inelna ṭan hma hauhin ban duhtu pawh an awm. Chutihrualin Old Trafford-ah Everton ṭantu ṭhahnem tak awm mah se auh elna a tawk lo.

Inkhelh banah Ole Gunnar Solskjaer chuan, "Ziaka tihfel tur a la awm. Brexit leh Covid-19 vangin hun a mamawh tam a, heti lam hi chu sawi thui ka tum lo. Medical a tih phawt a la ngai a, kan bulah a rawn tel vat theih kan beisei," tiin defender thar Varane chungchang a sawi a, Jadon Sancho pawhin vawiin aṭangin training a ṭan tur thu a sawi.

Manchester United chaun August 14, Inrinni tlai dar 5:00 hian Premier League-a an match hmasa berah Leeds United an mikhual dawn. Marcelo Bielsa hote hian Inrinni khan Europa League champion Villarreal nen friendly match an khel a, 2-2 in an inhnehtawk. English club tan hian Mateusz Klich leh Patrick Bamford ten goal an khung.