A bul ṭan nan PSG an chak

Paris St-Germain chuan season hmasa anga ke chheh sual an tum tawh lo niin a lang. Paris club hian Ligue 1 season thar an match hmasa berah kai thar Troyes chu 2-1 in an hneh.

Paris club hian minute kuana lekah si an phur, mualneitu lamin Oualid El Hajjam hmangin hma an hruai. Mahse, Inter Milan aṭanga an lak thar Achraf Hakimi hmanga an sut hnuah striker Mauro Icardi chuan chakna goal a khung.

Mauricio Pochettino-a'n a player thar zingah Hakimi leh midfielder Georginio Wijnaldum te a chhawr nghal a, keeper Gianluigi Donnarumma leh defender Sergio Ramos te erawh squad-ah telh an la ni lo.

PSG tan hian Kylian Mbappe pawh minute 90 chhung a inkhel, forward Neymar erawh team zingah a la tel ve lo. Season tir lama talbuai Paris club hian kuminah chuan point thum hmangin bul an ṭan.

Manager Poch chuan, "Minute 90 chhung kha kan duh ang thlapin kan khel lo a ni mai thei, league match hmasa bera point thum kan hmu thei erawh lawmna tur a ni. A nihna takah chuan inkhel harsa leh khirhkhan tak chu a ni chiang hle.

"Troyes khan fak an phu, an khel ṭhain ṭantu an nei ṭha hle, khatiang lakah kha chuan khelh ṭhat pawh a harsa ṭhin reng a ni. Euro leh Copa America khel kan ngah avangin training kan la nei tam tawk lo, chutiang chunga kan chak thei hi a lawmawm," a ti.

Zirtawp zan khan AS Monaco chu an mikhual Nantes nen 1-1 in an lo inhnehtawk tawh a, inkhel dangah Lyon leh Brest te pawh goal khat ve ve khungin point khat an lo insem tawh bawk.