Mipa basketball champion USA

United States leh basketball chu sawi hran theih a ni lo. US mipa basketball team hian France chu 87-82 a hnehin Tokyo Olympic gold medal an hlawh chuak, a zawna vawi li an champion tlinna a ni nghal chiah.

Ram pahnih hi inelna ṭan tirh khan an lo intawng tawh. France hian 2004 aṭanga tlawm la nei lo US hi group match hmasa berah an hneh, final inkhelah pawh a tawp thlengin an bei thei - mahse team ṭha zawk chu a tawpah an chungnung.

US tan hian nidang ang bawkin Kevin Durant chu an chakna hnar a ni. Brooklyn Nets star hian gold medal match pawimawh takah hian point 29 neiin an ram a chak pui a, ram tana gold medal vawi thum a dawnna a ni nghal bawk.

Kum 32 mi Durant chuan, "Hlawhtlinna chan hi tih ṭhan a awm thei lo, a lawmawm em em vek. Gold medal kan dawng a, zinkawng ngaihnawm leh hriatreng tawh tur kan hnutchhiah, player tan chuan mahni ram tana hlawhtlinna chan hi a hlu bik," tiin a sawi.

US hian ram leh ram basketball inelna chu an thunun hneh hle. Amaherawhchu tun hnaiah ram dang pawhin nasa takin hma an sawn tih chu a lang. Tokyo 2020 an match khelh hoah US hi an kal filawr hleithei bik meuh ta lo.

Chutih rualin US hian inkhel pawimawh leh chak ngei ngei a ngaih tawh chinah chuan an ṭhat bikna an lantir thei zel. Durant bakah Draymond Green, Jayson Tatum, Devin Booker leh Khris Middleton te an neih miau avangin ram dang tan chuan an la u hret.

Pathumna inchuhnaah Australia chuan Slovenia chu 107-93 a hnehin bronze medal an hlawh chhuak ve bawk.