Leicester-in City an barakhaih!

English football season bul ṭan a ni a, champion nomawi chawi hmasa ber chu Leicester City an ni! Foxes hian Inrinni zan khan Community Shield-ah 1-0 in Manchester City an hneh.

Leicester tan Kelechi Iheanacho chuan Nathan Ake laka penalty hlawh chhuakin minute 89-naah inkhela goal awmchhun hi penalty hmangin a khung a, City tan chhanglet turin hun a awm tawh lo a, Pep Guardiola leh a naute an tlawm.

Manchester City tan pound maktaduai 100 man Jack Grealish chu City a pan hnua a match hmasa ber khelhtir a ni a, mahse, Aston Villa captain hlui hian a man phu khawpin a la khel chhuak thei rih lo.

Brendan Rodgers-a hnuaiah Leicester-in an nomawi pahnihna an chawi leh ta a, Liverpool boss hlui enkawlna hnuaiah Foxes hian ropui zual zel an beisei a nih pawhin dem theih an ni lo ang.

Mang ram
Kum 2016-a Premier League nomawi an chawi hnuah tam tak chuan Leicester hian tlakchhiat lam an pan zui mai turah an ngai a, an player pawimawh N'Golo Kanté, Riyad Mahrez leh Danny Drinkwater te ho inhnaih tak taka an chân bawk avangin a awm lo hran lo.

Mahse, Foxes hian player ṭha an chher zel a, an chhuanvawr Jamie Vardy-a'n rinawm a thlan bawk avangin tun thlengin Premier League-a team hmuhnawm ber pawl an la ni reng.

Champions League khelh beisei zingah an tel ve reng a, season hmasaah FA Cup an champion a, City 'meuh' hnehin Community Shield-ah hnehna hlado an chham leh ta.

City lakah pawh Vardy bawk a hmuhnawm a, kum 34 mi striker hi a vanneih zan ni ngat se goal khung thei tur a ni a, a shot vawi khat City goalkeeper Zack Steffen-a'n a dansak chu a uiawm hle.

Beiseina
Leicester-in tlarhnung lamah buaina langsar an nei a, hei vang hian nipui transfer-a a free-a an lakluh Ryan Bertrand chuan inkhel bul a ṭan nghal a, mahse, player nei ṭha City lakah goal an chhuah lo.

Khup hliam vanga February hnua la inlan leh lo Harvey Barnes chu Leicester tana bul ṭanin a lo kir a, tlarhmaa James Maddison, Ayoze Pérez leh Vardy-te nena an inkawp thlirin Premier League team ṭha zinga chhiar tel loh an harsa.

Midfielder Wilfred Ndidi chu a hmuhnawm ngaiin a lo la hmuhnawm reng - vawi riat an khingpui ball a chhuhlet a, vawi nga tackle neiin vawi thum interception a nei a, Liverpool nena sawizawm Youri Tielemans nena an inkawp chu an ngaihtuahawm loh hle.

Rodgers-a'n bench aṭangin nipui transfer-a a lakluh Patson Daka leh Boubakary Soumare a luhtir bawk a, a tawi zawnga sawi chuan Foxes hi season tharah pawh team hmuhnawm pawl an ni leh ngei dawnin a lang.

City ṭha lo zawk
City boss Pep Guardiola-a'n Foxes nen an inkhelh hmain inbuatsaihna hun an neih ṭhat tawk loh thu a sawi a, a team chanve deuhthaw an inlan theih loh thu a sawi bawk - Kevin de Bruyne leh Phil Foden ten hliam vangin ngai an la awh lo a, Raheem Sterling chu chawlh hahdamna hun pek a la ni bawk.

Hei vang hian City tan kum 19 mi Cole Palmer leh kum 18 mi Sam Edozie ten bul an ṭan a, chutihrual chuan City hian Fernandinho, Ferran Torres, Ilkay Gundogan, Riyad Mahrez leh Rúben Dias te ho bul an la ṭantir thei a, bench aṭanga Rodri, Grealish leh Bernardo Silva an luh bawk avangin chhuanlam atana hman a thiang lo.

German midfielder Gundogan vanneih zan a ni lo a, a freekick pet chu Foxes keeper Kasper Schmeichel-a'n ṭha zetin a dansak a, yard 10 vela hla aṭangin uiawm takin a hlah bawk.

Rawlthar duhawm Edozie-a'n Gundogan duhsakna hmanga a hun duhawm neih chu a chhawr ṭangkai thei lo a, Mahrez-a'n freekick leh chance duhawm pangngai a neih a chhawr thei lo bawk a, centre forward pangngai nei lo City an tlawm.