Spurs-ah Romero a lut fel ta

Harry Kane dinhmun chiang lo karah Tottenham Hotspur fan-ten lawmna tur an nei ve leh ta a, defender Cristian Romero chu Atalanta aṭangin pound maktaduai 42.5 sengin an lalut a, a contract rei zawng hi tarlan a ni lo thung.

Kum 23 mi defender hi Copa America-a Argentina an champion theih nana player pawimawh a ni a, season hmasa Serie A-ah khan defender ṭha bera puan a ni.

Spurs hian Romero hma hian winger Bryan Gil chu Sevilla aṭangin an lalut tawh a, Atalanta keeper tho Pierluigi Gollini chu season khat chhung atan loan-in an lalut tawh bawk.

Romero chuan, "He club jersey ha a, he hmun ka rawn pan thei hi ka lawm takzet. Fan-te message min thawn zozai avang khan lawmthu ka sawi a, he hmuna lo kal tura min duh ang ngeiin ka lo kal ta e," a ti.

Argentine defender hi Atalanta-ah hian season hmasa khan loan-a khel ringawt a nih avangin Spurs-in Atalanta aṭanga an lalut hi mak tihna a awm mai thei.

Romero hi a nihna takah chuan Juventus defender a ni a, season hmasa khan Atalanta hian loan-in an hawh - contract-ah hian an duh chuan a ngheta lakluh theihna dan an neih thu a inziak tel.

Atalanta chuan hei hi chhawr ṭangkaiin euro maktaduai 16-in Romero hi a nghetin an lalut zet a, Spurs-ah an chhuahtir leh nghal thung - hei vang hian London club-ah hian loan angin contract a ziak phawt nia sawi a ni.

Khawthlang media ṭhenkhatten an tarlan dan chuan Romero hian season khat chu loan angin a khel phawt ang a, season tharah Spurs hian a nghetin an lalut ang.

Argentine defender manah hian pound maktaduai 42.5 hi an pe phawt ang a, a khelh ṭhat dan a zirin pound maktaduai li bawr vel la pek belh leh tur a ni bawk.

Atalanta chuan an defender hi duhsak taka thlahin, "Goal pawimawh khungin assist pawimawh tak tak a nei ṭhin a, chung zawng zawng aia pawimawh ber chu inpekna, tumna leh thinlung zawng zawng nena jersey a ha ṭhin kha a ni," an ti a, Spurs fans tan hriat a nuam khawp ang.

Spurs hi managing director of football thar Fabio Paratici hnuaiah indinthar an tum nasa hle a, Romero-a'n London club zawm a duh chhan pawh hi Paratici vang nia sawi a ni.

London club hian rei tak chhung an defender rinrawl lo ni tawh Toby Alderweireld chu Qatari club Al Duhail-ah an hralh a, attacking midfielder Erik Lamela-a'n Sevilla a zawm tawh a, goalkeeper Joe Hart chuan kum thum chhung atan Celtic a zawm tawh bawk.