Chelsea-ah Lukaka a kir leh dawn

Chelsea-in an player hlui Romelu Lukaku chu Inter Milan aṭangin an lalet dawn a, Belgian striker man tur hi pound maktaduai 97.5 zet a ni.

Kum 28 mi Lukaku hian Inter-a cham chhunzawm a duh thu sawi mah se a thutlukna sawh sawnin a man phu tawka an dawr a nih chuan Chelsea zawm a duh thu club hotute a hrilh.

Blues hi kum 21 mi Erling Braut Haaland nen nasa taka sawizawm an ni a, amaherawhchu London club-in Lukaku an lak dawn tak avangin Norwegian striker hi an ngaihven chhunzawm tawh lo ang.

Lukaku hian Man-chester City-in Aston Villa aṭanga Jack Grealish an lakna British record pound maktaduai 100 chu pha lo deuh mah se Belgian striker man belhkhawm erawh a ropui tham hle.

Belgian striker hian kum 2011 khan Anderlecht aṭangin pound maktaduai 20-in Chelsea a zawm. Blues aṭangin loan-a a khelhna Everton chu pound maktaduai 28-in kum 2014 khan a zawm leh a, Toffees aṭangin pound maktaduai 75-in kum 2017 khan Manchester United a zawm.

Kum 2019 khan English club aṭangin Inter Milan chu pound maktaduai 74 in an zawm a, tuna Chelsea an lakna tur nena chuan Lukaku transfer fee belkhawm chu pound maktaduai 294.5 a tling

pha hial.

Lukaku hian kum 2010 hnuah a vawi khat nan Inter Milan hi Serie A nomawi a chawi pui a, season hnih chhungin league match 72 khelhsakin goal 47 a khung a ni.