Hattrick nena season bul ṭantu Haaland

Erling Braut Haaland-a'n season bul ṭan nana a match hmasa berah hattrick a siam nghal - European club lian tam takte chil a tiput hi a awm lo hran lo.

Borussia Dortmund hian German Cup hmangin season bul an ṭan a, an match hmasa berah third division club Wehen Wiesbaden chu 3-0 in an hneh a, goal hi Haaland-a khung vek a ni - a ropuina belhchhahin a awm zel.

Kum 21 mi striker hian minute 26 leh 31-naah goal a khung a, minute 51-naah penalty hmangin a hattrick siamna goal a khung - goal thum khung tur hian minute 25 bak a mamawh lo a, penalty pawh hi a hlawhchhuah a ni.

Norway tan vawi 12 inlana goal sarih khung thei Haaland hian season hmasa khan Dortmund tan inelna hrang hrangah match 41 khelin goal 41 a khung a, a record hi a chhuanawm hle.

Chelsea-in lakluh tumin hel nasa viau mah se Dortmund lamin hralh tumna an neih loh avangin an beidawng. German club hian Manchester United lakah Jadon Sancho an chân tawh a, transfer bazar khata player langsar pahnih chhuahtir an

duh lo.

Dortmund hian August 14 zanah Bundesliga bul an ṭan dawn a, Eintracht Frankfurt nen an league match hmasa ber an khel ang.