Fofana a chawl rei dawn

Leicester City fan-ten an thu hriat chak loh ber pawl an hria a, an defender pawimawh Wesley Fofana chu kum 2021 chhung chuan a inkhel tawh dawn lo.

Kum 20 mi Fofana hi Villarreal nena friendly match an khelh ṭumin a inhliam a, French defender hliamtu Villarreal forward Fer Nino chuan mipui hriatah ngaihdam dilna a lo tichhuak tawh.

Leicester boss Brendan Rodgers chuan, "Kum 2022 bawr velah lo kir turin kan beisei, a hliam hi rin aiin a na a ni. Rilru hahdam takin a awm a, he hmuna awm a, a ṭhiante kianga hun hman a duh a ni.

"Player ṭhenkhat chuan hliam an neihin an ram lama haw an duh ṭhin a, Fofana erawhin he hmuna awm chhunzawm a duh. Thawhṭanniah zai a ni ang a, chuta ṭang chuan bul a ṭan leh dawn a ni," tiin a defender chungchang a sawi.

Foxes tan centre back Jonny Evans hliam a la dam chiang hleithei lo a, Rodgers-a'n transfer bazar khar a nih hmaa centre back thar a lei a nih pawhin a mak lo ang.