Villa leh Sevilla inkhel tur ṭhulh

Premier League club Aston Villa chu Sevilla nen Inrinni khan friendly match khel tura tih ni mah se Covid-19 vangin an inkhel tur hi ṭhulh a ni.

Villa chuan Sevilla squad-ah Covid-19 kai an awm avangin La Liga club hi England-a an zin theih loh thu an tarlang a, player nge coaching staff zingah hri leng kai hi an awm erawh tarlan tel a ni lo thung.

Premier League club hian he inkhel tur atana ticket lei tawhte chu pawisa an pe kir leh vek a, mahse, an training session chu a thlawna en theih turin an ruahman thung a ni.

Nizan dar 9:30 khan Villa hian Serie A club Salernitana chu friendly match an khelhpui a, he thu buatsaih a nih lai hian result kan hre hman lo.

Season hman zawh taka Premier League-a 11-na ni thei Villa hian Manchester City lakah an thiampuipa Jack Grealish chu pound maktaduai 100-in chân mah se transfer bazar-ah an che na hle.

Argentine forward Emiliano Buendía chu Norwich City aṭangin pound maktaduai 33-in an lalut a, Bayer Leverkusen winger Leon Bailey chu pound maktaduai 30-a lalutin Southampton striker Danny Ings chu pound maktaduai 25-in an lei tawh bawk.

Inter Milan aṭangin tawnhriat nei ṭha Ashley Young chu free transfer-in an lalut tawh bawk a, August 14 zana Watford nena an league match hmasa ber khel tur Villa hi season tharah en bik an sual lo ang.