Hripui veite enkawl dan sawiho

Health minister Dr R Lalthangliana hoin nimin khan Secretariat conference hall-ah Covid-19 veite enkawl dan sawiho a ni.

Ṭhutkhawmah hian, hripui veite hmun khata dah khawmna kalpui mek dan chu ennawn a ṭula an hriat thu te, in lama inenkawl (home isolation) danah, dinhmun derthâwng - kum upa te, natna benvawn nei leh natna khirh takte chu uluk taka vil an ṭul thu leh fimkhur taka awmze nei zawka dah hrana enkawl uluk an ngaih thu te, home isolation-a inenkawl dan kaihhruaina ennawn a ṭhat thute an sawi.

RT-PCR test kit leh RNA extraction kit chatlak chungchangah, nizan lam khan eng emaw zat chu lirtheia rawn phurh thlen beisei a ni a, vawiinah thlawhtheihna hmanga phurh thlen belh beisei a ni. Damdawi ṭhenkhat chu Inrinni zan khan Tripura lam aṭangin phurh thlen a ni tih an tarlang.

SRH-ZMC-a damlote enkawltu doctor indaih lohna phuhru turin specialist doctor pali lak belh thuai beisei a nih thu tarlan a ni bawk.