A vawi khat nan Jorge Martin a chak

Pathianni zana tlan zawh tak Styrian Grand Prix-ah Jorge Martin a tlan chak ber. Spanish rider hian MotoGP huanga a chakna hmasa ber tawng tur hian champion lai Joan Mir hmaah a tlan thleng thei a ni.

Qualifying lama a chet ṭhat avangin a hmasa ber (pole) aṭangin a tlan ṭan, chetsualna thlen vangin an tlan ṭan dan bul ṭan nawn ni mah se a buai phah chuang lo, hnehna a chan avang hian world championship lamah 12-na dinhmun a luah nghal bawk.

Chetsualna
Red Bull Ring-a intlansiakah buaina a chhuak hma, lap thumna lekah Lorenzo Savadori chuan hun rei tak a chawlh hnua lo kir Dani Pedrosa a ti palh, rider pahnih hian hliam na tak tuar lo mah se kangmei a chhuah avangin chawlh lailawk a ngai.

Pedrosa chuan inelna hmachhawn zui thei dinhmunah a ding lo tih a hria. Savadori erawhin tlan zui a tum, a hriselna dinhmun endik a nih hnuah natna a nei lo tih hriat ni mah se a tlan zui ta chuang lo.

Chetsualna thleng hian intlansiak chu darkar khat chuang a ti khaihlak, lap 28 an tlan tur pawh lap 27-ah tih tlem a ni a, rider ṭhenkhat rilru chiai leh baihvai taka an awm karah tawnhriat nei tam lo Martin a vannei ta ber.

A hlu bik
Ducati rider hian bike intlansiakna sang ber hi vawi ruk chauh a la hmachhawn, atan chuan hnehna chan mai hi awih pawh a harsa zawk hial mai thei - hnehna a chan hnuah atan a chak chu a hlut thu a sawi chhuak.

Kum 23 mi Martin chuan, "Intlansiak bul kan ṭan hmasak kha chuan inrintawkna ka ngah, mahse chesual an awm hnuah erawh rilru pangngai put chhunzawm a awlsam lo. Hma ka hruai avangin ka dinhmun erawh a ṭha ta tho, ka tan chuan hetiang hun aia hlu hi a awm thei chuang lo ang," a ti.

Rider championship lamah chuan Fabio Quartararo-a'n hma a hruai chhunzawm. Yamaha rider hian Styrian Grand Prix-ah pathumna dinhmun a luah a, inelna neih tawh chinah point 172 hmuin, amah hnaih bertu Johann Zarco (132 points) aiin a fal ta hle.