Championship khelh ṭan a ni ta

Premier League hnuaia inelna sang ber Championship chu kartawp khan khelh ṭan a ni a, chanchin ngaihnawm tak tak a awm. Pathianni zan khan Middlesbrough-in season liam ta playoff khel pha Fulham an chelh a, 1-1 in an inhnehtawk. Birmingham-in Premier League aṭanga tla thla him Sheffield United 1-0 in an hneh bawk.

Sir Alex-a'n a thlir
Inrinni khan Kenilworth Road-ah Luton Town-in Peterborough United chu 3-0 in an hneh a, Sir Alex Ferguson-a'n Championship inkhel hi a hmunah a en. Peterborough manager Darren Ferguson hi Sir Alex-a fapa a ni.

Kum 49 mi Darren Ferguson hi Man United academy chhuak a ni a, a pa hnuaiah senior team-ah pawh league match 27-ah a inlan. Manager hna hi 2007 aṭang khan a ṭan a, Peterborough United aṭangin a enkawl a, tun hi ṭum thum a enkawlna niin Preston North End leh Doncaster Rovers a enkawl tawh bawk.

Derby tan beiseina
Derby County-in khelmual pawnah harsatna an tawk a, club neitu thar an neih theih mai loh avangin player hlawhah buaina an tawk a, transfer-ah harsatna an nei bawk.

Hetichung hian Wayne Rooney hote hian Huddersfield lakah point khat hlu tak an hlawh chhuak. Pride Park Stadium-ah Derby-in Curtis Davies hmangin minute 39-naah an khung hmasa zawk a, Nabby Sarr-a'n minute 45-nah Huddersfield tan a sut.

Blades an chak lo
Premier League aṭanga tla hlim Sheffield United-in season bul an ṭan ṭha lo a, Birmingham City lakah 1-0 in an tlawm. Lee Bowyer-a'n Manchester United aṭanga loan hmanga a hawh Tahith Chong chu bul a ṭantir a, Dutch winger hian Maxime Colin-a goal khung tur a siamsak bakah a khel ṭha hle.

Sheffield lamin Arsenal nena sawizawm keeper Aaron Ramsdale bakah Oliver Norwood leh David McGoldrick te an luhtir chungin siphurh an sut thei lo.

Championship-ah hian team 24 an awm a, League 1 aṭangin club pathum Hull City, Peterborough United leh Blackpool te an tel thar a; Premier League aṭangin Fulham, West Bromwich Albion leh Sheffield United te an tla thla thung.