Italian rawlthar a champion

Citi Open khelh zawh takah Jannik Sinner a thiam ber. Italian rawlthar hian champion turin final inkhel hmuhnawm takah Mackenzie McDonald chu 7-5, 4-6, 7-5 in a hneh a, ATP title pathum a lak tlinna chiah a ni.

Kum 2009 aṭang khan Citi Open (ATP 500 event) neih ṭan niin, kum 19 mi Sinner hi champion thei naupang ber a ni nghal - tun thla tawpa khelh tur US Open atan beisei a nei sang zui ang.

Sinner chuan, "Kum naupang ber ni mah ila inkhelah chuan naupan a sawi theih loh, tun dinhmun thleng tur hian hun rei tak chhung chu rim takin ka lo bei tawh a ni," tiin a sawi.

Alexander Zverev chuan 2017 khan kum 20 mi chauh ni chungin Citi Open title hi a lo la tawh a, tunah chuan German tlangval record hi Sinner-a hian a rawn khum ta chiah.