Messi tel lohna Barca chak

Pathianni zan khan Estadi Johan Cruyff-ah Barcelona-in Cristiano Ronaldo telna Juventus chu 3-0 in an sawp. Catalan club tan hian Memphis Depay (3'), Martin Braithwaite (57') leh Riqui Puig (90+2') ten goal an khung.

Tunkar tawpah La Liga ṭan a ni dawn a, hemi a nih avang hian Barca tan Joan Gamper Trophy hi friendly match ni mah se season thar inpuahchahna atan a pawimawh hle.

Ronald Koeman leh Massimiliano Allegri ten team ṭha pangngai an luhtir a, Juve tan tlarhmaah Cristiano Ronaldo leh Alvaro Morata te an awm. Barca-in Depay luhtir mah se Manchester City aṭanga an lakluh Sergio Aguero chu squad-ah an tel lo thung.

Aguero hian Barca a zawm chhan ber Lionel Messi a awm tak loh avangin club hruaitute hnenah chhuah a dil niin sawi a awm. Messi a chhuah boruaka Barcelona-in Ronaldo telna Juve an hneh hi result ṭha a ni a, chutihrualin Messi meuh a chhuah dawn avangin khelmual chhunga result hi khelmual pawn chanchinin a la hliahkhuh hneh hle.