Ruahin England a chhan

England leh India ten August 8, Pathianni khan Test match vawi nga khelh tura a hmasa ber chu an khel zo a, ruahsur vangin an inhnehtawk. Match hnihna hi August 12-16 chhung hian Lord's-ah khelh a ni ang.

Trent Bridge-a first Test khelhah India-in bul an ṭan ṭha zawk. England-in bat thlang hmasa mah se run 183 chauh an siam a, India tan Jasprit Bumrah (46/4) leh Mohammed Shami (28/3) te an khel ṭha hle.

Men in Blue tan first innings-ah KL Rahul (84) leh Ravindra Jadeja (56) te an che ṭha a, run 278 an siam. India dinhmun a ṭha a, amaherawhchu second innings-ah England captain Joe Root-a'n century (109) siamin Three Lions tan beiseina a rawn siam a, India tan target atana an chhawpchhuah chu 209 runs a ni.

Second innings-ah India-in wicket khat chauh an la hloh a, 52/1 runs siam tawh mah se ruahsur vangin ni tawp ber chu khelh theih a ni lo. Virat Kohli hote an vanduai a, ruah sur vangin first Test-ah an inhnehtawk.