Lionel Messi-a'n Paris Saint-Germain a pan dawn
Khawvel footballer piang tawha ṭha ber ang hiala mi ṭhahnem takin an chhal Lionel Messi chuan Pathianni khan Nou Camp-ah Barcelona thlahna hun a hmang. Nimin khan Paris Saint-Germain ṭantu ṭhahnem takin airport-ah an hmuak a, he thuziah lai thleng hian Messi-a'n Paris a thlen thu hriat a ni lo.
Barcelona ṭantu ṭhenkhatin nimin zingkar aṭangin Messi hi a in kawtah an chang ve bawk a, an nghak chhuak ta em tih kan hre hman lo bawk. Chutihrualin thuthang awm dan aṭangin Messi hian PSG a pan ngei dawn tih a hriat theih thung.
Tunge mawhphurhtu?
Barcelona-in chiang taka an sawi hnuah Messi-a'n rawn sawi nawn lehin Catalan club tana contract a pawhsei theih lohna chhan chu La Liga vangah a puh.
La Liga hian sum vanga club tlachhe tur ven nan salary cap an siam. 2019-20 season-ah kha chuan Barca salary cap hi euro maktaduai 671 a ni pha daih a, chutihrualin season liam ta kha chuan euro maktaduai 347-ah a tla thla.
Barca hian kum 2020 khan euro maktaduai 117 an hloh a, tun dinhmunah lei ba euro tluklehdingawn 1.4 an nei mek a, heti taka an talbuai chhan hi chu Covid-19 vang chu ni bawk mah se club president hlui Josep Maria Bartomeu hnuaia an sum hman dan fuh tawk loh vang a ni.
Bartomeu hnuaia manto taka a lakluh Philippe Coutinho (€120m), Ousmane Dembele (€105m), Antoine Griezmann (€120m), Arda Turan (€34m), Malcom (€41m), Andre Gomes (€35m) leh player ṭhahnem takten beisei an pha lo.
Sum lama talbuai Barca hi season thara an salary cap hi pound maktaduai 160 bawr vel tura sawi a ni a; Coutinho (€20m), Griezmann (€27m) leh Dembele (€24m) te an chhuahtir theih loh bawk avangin an player neih sa hlawh ringawt pawh hi euro maktaduai 144 bawr vel a ni nghal der.
Barca hian Messi chhiar tel loin an player thar Sergio Agüero, Eric García, Emerson leh Memphis Depay te pawh an La Liga salary cap chhunga hnawhluh an harsat. President thar Joan Laporta-a'n club dinhmun a hrechiang a, Messi-a'n 50% lawihin a hlawh tih hniam remti mah se Barcelona-in enkawl thei tawh lo.
Messi chuan, "Cham turin ka theihna zawng zawng ka chhuah," tiin mittui tla chhungin a sawi a, Barcelona pawhin Laporta hoin theihtawp chhuah ve bawk mah se Bartomeu hnuaia an club kalphung fuh lo an tuar a, an club history-a player ropui ber an chan phah ta ni.
PSG an lawm
Messi-a'n mittui a hru lai hmuh a hrehawm a, cameraman ber pawh a mittui a tla. Pathianni tlaia room chhunga awmten hnukulh chungin Messi hi a phu angin zahna chibai (standing ovation) an pe a, TV kal tlanga thlirtute pawhin room chhung boruak rip tak chu an tem pha hial ang.
Barcelona-in mittui nena Messi an thlah karah hian PSG an hlim thung a, French club hi player ropui bik an lak theih dawn avangin an lawm a ni. Messi ngeiin PSG nen an inbiak thu an sawi a, French club hian chuhpuitu lian tham an neih miau loh avangin a chang dawn tih a hriat theih.
PSG hian tun hmain Ronaldinho an kawl tawh a, amaherawhchu Brazilian star hlui hi a lar tak tak hma a ni. Tunah erawh Neymar leh Kylian Mbappe te an lar vanglai takin an lalut a, tunah footballer piang tawha ropui ber (?) Messi an la hnai. Mang lam pawha an man phak loh tur kha a takin a thleng dawn a, a ropui takzet.
An inremna chu?
Messi agent hi a pa Jorge Messi a ni a, PSG contract zawrh an pawm hunah Paris an pan dawn. PSG leh Messi aiawhte hi kar liam ta Ningani aṭang khan an inbe ṭan tawh a, Messi te lam hian PSG contract zawrh hi an dan hre mite nen an zirchiang.
PSG tana Messi hlawh tur thuchiang la awm lo a, khawthlang media te tarlan dan chuan kum khatah euro maktaduai 31.5 a ni ang a, chhiah pek hnuah kum khatah euro maktaduai 25 a ni dawn tin an ziak. Messi hian kum hnih daih contract a ziak ang a, kum khat pawhsei theih dan a awm. Heng bakah hian contract a ziah avangin euro maktaduai 25 a dawng bawk ang.
Chutihrualin France chanchinbu L'Equipe chuan Messi hian tax zawh hnuah euro maktaduai 40 a hlawh dawn tihin an ziak ve thung a, kum khat liam taa PSG hlawh pek huamna zat aiin tlem mah se player beisei a phak tih an tarlang. L'Equipe tarlan danin Neymar-a'n kum khatah euro maktaduai 35 a hlawh a, Messi hi PSG player zinga hlawh tam ber a ni dawn.
Hlawh chungchang leh transfer fee te hi official-a phochhuah a nih ṭhin loh avangin media hrang hrang tarlan dan a inang ṭhin lo. Spanish chancinbu El Mundo chuan kumin kumtir khan Barca-a Messi hlawhzat an pholang a; signing on fee leh bonus te thliar hnuin kum khatah euro maktaduai 70 vel a hlawhah a ngaih a ni.
Barca-ah Messi hian 50%-a a hlawh tih hniam a huam a, chumi awmzia chu euro maktaduai 35 vel a hlawh dawn tihna a ni. Tunah erawh a club hmangaih Barca tan ni lo a, PSG tan contract a ziah dawn avangin a hlawh a tih hniam chiam hi a rinawm lo a, chutihrualin an contract hi an thlangzarh a nih ngawt loh chuan a bawr vel bak hriat theih a ni lo ang.