Toronto lamah Nadal

Rafael Nadal chuan US Open inbuatsaih nan inelna dang a hmachhawn leh dawn. Tun kar chhunga khelh tur Toronto Open-ah Spanish star hi a inlan dawn a, kar hmasa khan Citi Open lamah beisei phak loin a lo tlah tawh a ni.

Grand Slam vawi 20 champion tawh Nadak hi Wimbledon leh Tokyo 2020 aṭangin a inhnukdawk a, tun hnaiah inkhel leh tawh mah se beisei a la phak lo - season hmasa lama a khelh loh US Open erawh a ṭha thei ang bera khelh ngei a tum.

World number 3 Nadal chuan, "Thla khat aia rei chu ka taksa hriselna lamah ngai ka la awh lo. A nihna takah chuan Washington lama ka inkhel kha in lo en a nih chuan ngai ka la awh lo tih a lang.

"Tunah hian eng dinhmunah tak nge ka din dawn a la hriat loh, keimah lamah chuan ka inpeih thawkhat hle. Amaherawhchu, court luh hnuah thil tam tak a la thleng thei, ka awmdan tur hi ka sawi lawk vak thei rih lo," tiin a sawi.

Nadal bakah hian Daniil Medvedev pawh a inlan dawn. Russian star hi hard court-a inkhel thiam a ni a, tun ṭumah hian seeded pakhatna pek niin champion tura rinkai a ni ang.

Player langsar dang - Andrey Rublev, Denis Shapovalov leh Hubert Hurkacz te pawhin inelna hi an hmachhawn dawn a ni.