Robertson a hliam nâ

Liverpool defender Andy Robertson chu Athletic Bilbao nen friendly match an khelh ṭumin a kerek a hliam a, Scotland international defender hi eng chena rei nge a chawlh dawn hriat a la ni lo.

Reds manager Jurgen Klopp chuan a player hliam hi endik a nih tur thu sawiin, "A nat dan tak kan la hre lo, a lan danah chuan a nat hmel," tiin a sawi. Premier League season tir lamah kan hmu thei dawn lo tih chu a chiang.

Kum 27 mi Robertson hian 2017 khan Hull City aṭangin Liverpool hi a zawm, season li chhung chu player pawimawh a ni phak tawh - League bakah Champions League nomawi a chawi pui tawh a ni.

Robertson inhliam hi Liverpool ṭantute tan chanchin lawmawm lo a ni, chutih rualin season hmasa lama an chhawr theih loh Virgil van Dijk chu minute 72 chhung a inkhel thei tawh - Dutch defender hi a khup hliam a dam tawh.

Nipui bazar chhungin Reds hi an thawm a reh hle, tlarhnung lam ti chak turin RB Leipzig aṭanga Ibrahima Konate an lakluh bak sawi tur langsar an la nei lo, player thar erawh an la neih belh mai thei.

Klopp chuan, "Ka squad neih saah hian ka lungawi hle, anni hian hlawhtlinna chang turin theihna an nei sang tawk. Chutih rualin bazar hun a la zo lo, bazar an khar hmain thil eng emaw chu a la thleng mai thei," tiin a sawi.