Bojan-'n J League club a zawm

Barcelona leh Stoke forward hlui Bojan Krkic chuan J-League club Vissel Kobe a zawm a, Catalan club tana a khelhpui ṭhin Andres Iniesta nen an khel dun dawn.

Kum 30 mi Bojan chuan, "Japanese nun dan phung hi ka ngaisang a, hriatchian theihna hun ṭha ka nei hi ka lawm. Chona thar ka hmachhawn dawn a, ka phur tawh hle," tiin a sawi.

Bojan hian kum 17 leh ni 19 mi lek a nihin Barcelona tan a khel ṭan a, Messi record khumin Catalan club tana khel thei naupang ber record te chelh hman mah se beisei a pha lo.

Spanish forward hian Roma, Milan, Ajax, Stoke City, Mainz leh Alaves ah te a khelh kual hnuin MLS club Montreal Impact a zawm a, J League club Vissel Kobe-ah career ṭan ṭhat leh a tum dawn a ni.