Messi nen kan tawrh a inang - Grealish

Manchester City-in pound maktaduai 100-in Jack Grealish an lalut a, English midfielder hi Pep Guardiola-a'n Community Shield-a a chhawr hnuah Thawhṭanni zan khan an pho chhuak. English midfielder chuan Lionel Messi nen an tawrh an inang thu a sawi chhuak.

Kum 25 mi Grealish hian Etihad Stadium-ah kum ruk daih contract a ziak a, Pathianni zana Tottenham Hotspur nen an inkhelh hunah a inlan beisei a ni.

Tu nge Grealish?
Grealish hi September 10, 1995 khan Birmingham-ah a piang a, an khaw club leh a naupan tet aṭanga a ṭan Aston Villa chu kum ruk a nihin a zawm.

Amah hi Irish thisen kai a nih avangin Republic of Ireland tan U17, U18 leh U21-ah te a khel a, kum 2016 aṭangin England Under 21 tan khel ṭanin England senior team tan September 8, 2020 khan Denmark nen goal awm loa an inhnehtawk ṭumin ram tan a khel ṭan.

Grealish hi talent nei ṭha bik a nih avangin naupan lai aṭanga lar hat a ni pha hrim hrim a, tleirawl tha zat hun laiin nun thlah dah zeuhin mi fel chungchuang a ni bik lo.

Kum 2015 khan Grealish-a'n Tenerife-ah chawlh a hmang a, zu rui chaht-thla thlalak vangin a hming chhe hle. Covid-19 darh ṭantirh lai khan Grealish hian twitter kaltlangin ina tawm a ṭulzia a sawi a, amaherawhchu amah ber hian dan bawhchhiain a zu ruiin car ding ṭha hle hle a su.

Grealish hian hmingchhiat ṭum nei bawk mah se khelmualah erawh Aston Villa tan 'hero' a ni pha a, kum 2019 khan Villa hi Championship Playoff hmangin Premier League-ah a kaipui a, tun thlengin an tla leh tawh lo.

Mittui a luang
Manchester City player anga media a hmachhawn hmasak berah Grealish chuan, "Tute pawhin Messi-a'n press conference a hmachhawn dan kha an hmu vek ang. Khatiang chiah khan keipawhin ka tuar a ni. Hotel ka chhuahsan hmain team, staff leh player-te ka bia a, ka mittui a tla.

"Kum li mi ka nih aṭangin Aston Villa season ticket kawltu ka ni a, thutlukna siam a harsa. Chutihrualin ka tan hun ṭha a inher a, Champions League khelh châk em em mah ila Aston Villa-in an khel dawn lo. Chuvangin nomawi chawi tur leh Champions League khel turin Man City hi ka pan a ni," tiin a naupan lai aṭanga a khelhna Aston Villa chhuahsan har a tih thu leh a chhuah chhan a sawi.

Grealish leina man hi pound maktaduai 100 a ni a, kum 2016-a Manchester United-in Juventus aṭanga Paul Pogba lakna pound maktaduai 89 chu khumin English football history-a player manto ber a ni.

A khelhna tur
Man City hian Grealish hi Sergio Aguero kalsan jersey no. 10 an pe a, Aston Villa captain hlui hi winger leh attacking midfield-ah a khelh theih avangin khelhna theihna pawh a ngah hle.

Pep Guardiola hnuaia khelhna tur sawiin Grealish chuan, "Pep-a'n position hrang hrangah ka khelh theih thu min hrilh. Kei pawhin ka khelh theih ka ring a, Man City-in ball an chan tam avangin a awlsam lehzual pawh ka beisei," tiin tlarhma lamah team-in an mamawh dan a zira a khelh tur thu a sawi.

Grealish chuan sawi chhun-zawmin, "Club-in ka mana sum tam tak an sen hian min rintawk zia a lang a, an duh tak nomawi hmanga ka chhanlet theih ka beisei. Chutihrualin ka chungah pressure engmah min pe lo a, awm a nawm phah hle," tiin a sawi.

Man City hian Pep Guardiola hnuaia an season hmasa berah nomawi chawi lo mah se tunah erawh Premier League nomawi pathum, League Cup nomawi pali, FA Cup pakhat leh Community Shield pahnih an chawi tawh.

Chutihrualin an duh ber Cham-pions League nomawi an la chawi lo a, Grealish-a'n pressure an pek loh thu sawi mah se sum hmang tam Pep Guardiola leh a hoten inelna ṭan a nih meuh chuan pressure an ngah leh khawp ang.