ICC-in Olympic-ah cricket tel tir an tum

International Cricket Council chuan Olympic Games-a cricket a tel theih nan dilna an thehlut dawn. ICC chuan 2028 Los Angeles-a cricket telh chu an hmachhawp lian ber a nih thu a sawi.

Cricket inelna hi Paris khawpuia Olympic neih ṭum kum 1900-ah chauh khelh telh a ni a, kum 128 hnuah tel leh theih an beisei. ICC chairman Greg Barclay chuan, "Kan thil thlen turah hian infiamna dangte pawhin min thlawp a, cricket hmalam hun atan Olympic hi a tel. Khawvel pumah fan tluklehdingawn khat chuang kan nei a, chung zinga 90% chuang chuan Olympic-a tel hi an duh," tiin an pawm tlan thu a sawi.

Nakkum hian Birmingham-ah Commonwealth Games neih a ni dawn a, hmeichhe cricket inelna telh ṭan a ni dawn. Greg Barclay chuan sawi chhunzawmin, "Cricket hian ngainatu a ngah hle. Asia chhim lamah hian cricket ngainatu 92% vel hi an awm a, chutihrualin USA-ah khuan mi maktaduai 30 vel cricket tui an awm. Heng fan-te hian Olympic-a cricket inelna hmuh hi an châk a ni," tiin a sawi.

Paris 1900-a cricket neih a nih ṭum khan team hnih chiah an tel a, Great Britain leh France ten medal an inchuh. A tirah tak chuan Belgium leh Netherlands te pawh tel tura ruahman an ni a, amaherawhchu an inhnuh dawh tak avangin match khat chauh a awm. Great Britain hian 158 runs a hnehna changin gold medal an la.