Covid-in Premier League a kiansan thei lo

Football ngainatute nghahhlelh Premier League season ṭan turin ni rei lote chiah nghah a ngai ta - mahse, hetiang boruak karah hian Covid-19 in English top flight football a kiansan thei bik lo.

Premier League chuan Covid-19 test thar berah player leh staff pakuain hri leng an kai thu an puang a, August 2- 8 inkar khan Premier League chuan round hniha test neiin a kalpui a, mi 3,118 an test aṭangin mi pakuain hri hi an kai tih hmuhchhuah a ni.

August 13 zanah Premier League khelh ṭan a ni dawn a, zan dar 12:30-ah kai thar Brentford chuan Arsenal an mikhual dawn.

Premier League hian season hmasa ang thoin kar khatah vawi hnih Covid-19 test a neih ṭhin chu a kalpui dawn a, kartin test an kalpuiah hian 'lateral flow test' hmanga test an nei a, heta result 'positive' te chauh chu PCR hmanga an result confirm turin test an ni leh dawn a ni.

Covid-19 vangin tun season Premier League-ah team talbuai an awm nual tawh - Arsenal chuan USA-a an pre-season tur chu an team zingah Covid-19 kai an awm avangin an lo ṭhulh tawh a, Aston Villa, Manchester United leh Chelsea te chuan Covid-19 vang thoin an pre-season friendly match ṭhenkhat chu an lo ṭhulh tawh bawk.