Ka nu, a la danglam dawn alawm - Lukaku

Manchester United striker hlui Inter Milan aṭanga Chelsea zawm mai tur Romelu Lukaku hi May 13, 1993 khan Belgium khawpui lian ber dawttu Antwerp-ah Congolese nupa Roger leh Adolphine Lukaku te inkarah apiang.

A naupan laiin Lukaku chuan, "Nu, a danglam dawn. Anderlecht tan ka khel ang a, kan nun phung hi a inthlak thuai ang. Chumi hunah chuan kan hmalam hun ngaihtuah buai a ngai tawh lo ang," tiin a tiam a, tunah chuan khawvel footballer hausa berte zinga mi a ni ta.

Lukaku-a'n ama chanchin ngei a sawi chu han chhiar chhunzawm rawh le.

Kum ruk mi ka ni a, chhun chaw ei turin ka haw a. Ka nu chuan chhang leh bawnghnute min siamsak a, naupan lai chuan ei tur tui hnai dang kan ngaihtuah lo nachungin a nihna takah chuan kan phak tawk a ni a, thil dang leina tur kan nei lo.

Ṭum khat chu ka nuin refrige-rator aṭanga bawnghnute a la chhuak chu ka hmu a, hemi ṭum hi chuan tui nen a lo chawhpawlh a. Nui sangin engmah a danglam lo tih lantir tumin a rawn chhawp a, thil awm dan erawh ka hrechiang si. Kan rethei satliah lo a, neih kan nei lo takzet tawh a, kar tluana pawisa hman tur pawh kan nei tawh lo.

Ka nu rilru ti na turin sawisel ka tum lo a, ka hmaa chhawp ei tur chu ka ei mai a. Amaherawhchu Pathian hnenah thu ka tiam nghal a, tu emawin an kut an elh ri ang mai hian ka harh chhuak a, ka tih tur leh ka tih dan tur chu ka mitthla a, ka chiang nghal em em a ni.

Mi tam takin ka rilru paukhauh dan hi an sawi ṭhin a, a chhanna chu kei aia paukhauh hi an awm bik lo. Thim hnuaiah ka nu leh unaupa nen kan ṭawngṭai ṭhin a, beiseina nen kan nun dan thlak hun hi kan thlir ṭhin.

Hrehawm taka ka nu awm chu ka hmu thei lo a, ṭum khat chu school aṭanga ka hawin ka nu chu a lo ṭap a. Tah chuan ka intiamna chu ka hrilh ta a, "Nu, a danglam dawn. Anderlecht tan ka khel ang a, kan nunphung hi a inthlak thuai ang. Chumi hunah chuan kan hmalam hun ngaihtuah buai a ngai tawh lo ang," tiin ka hnem.

Anderlecht a zawm..
Lukaku hian kum nga mi a nihin tualchhung club Rupel Boom tan a khel a, Belgian Pro League club Lierse scout ten hmu fuhin kumin 2004 khan he club hi a zawm.

Belgian striker hian Lierse tan hian kum hnih chhungin match 68-ah goal 121 a khung a, amaherawhchu Lierse hi an relegate avangin Belgian club ṭha Anderlecht chuan youth player 13 zet an leisak a, Lukaku pawh a tel nghe nghe.

Lukaku hian youth team tan kum thum dang khel lehin match 93-ah goal 131 a khung a, senior team tan kum 16 mi lek a nihin May 13, 2009 khan professional contract a ziak a, ni 11 hnuah Belgian First Division-a Standard Liège nen championship playoff an khelh ṭumin a inlan nghal a ni.

Lukaku ṭawngka ngeiin
Senior team tan kum 16 ka nih khan khelh ka duh tawh si a, hetihlai hian youth team-ah pawh bench-ah hun ka hmang tam zawk. Coach chu inchawipuiah ka sawm ta a, December thlaa goal 25 ka khung hman chuan khelhna hmun tam zawk ka dil a, ani chuan phalin ka khung lo a nih chuan player hruaina motor chu ka tihfai ṭhin a ngai dawn thung.

November thlaah goal 25 ka khung tling tawh a, kan coach khan naupang ril ṭam a inchawipui miau avangin thutlukna a siam fuh lo. Tun hun kan thlen takah chuan ka pu khan kan dinhmun hi rawn hmu ve se ka ti hle.

Premier League-a khelh te, Manchester United tana ka khel te, Champions League leh World Cup ka khel te hi ka sawi lo a, ka thutiam ka hlen thu leh ka khawsak phung lo danglam ta hi hmu se ka duh a ni.

A dang ta
Naupan laia puar khawp ei tur nei lo Romelu Lukaku chu khawvel player manto ber zinga mi a ni tawh a, Manchester United-in an leina man pawh pound maktaduai 75 zet a ni. Kum 2019 nipui khan Old Trafford aṭangin Inter Milan a zawm a, Serie A club-in Beglian striker lakluh nan pound maktaduai 74 (80m) an seng.

Lukaku hian season hnih lek chhungin Nerazzurri hi league nomawi a chawi pui a, tunah chuan Chelsea-ah a let dawn a, a man hi pound maktaduai 97.5 zet a ni. Belgian striker-in London club a zawm hmasak khan pound maktaduai 20 man a ni a, Blues aṭanga Everton a pan khan pound maktaduai 28 a ni. Lukaku hralhna belhkhawm hi pound maktaduai 294.5 a tling pha hial a, hei aia footballer hlawhtling an awm pawhin an tam kher lo ang.

Lukaku nau Jordan Lukaku pawh footballer hlawhtling tho niin Serie A club Lazio tan a khel mek. Retheihna hnuaiah Lukaku te unau an sei lian a, an thawhrimna leh tumruhna rah sengin khawvel huap footballer hlawhtling an ni.

Lukaku-a'n Serie A nomawi a chawi khan T Shirt var a ha a, chu kawr hmaah chuan, "Ka thinlung hian a hre reng che u, ka hmangaih che u a, ka ngai che u," tih ziahna kawr chu a ha a, a pi leh pu thlalak nem kai a ni a, an hming tarlan a ni bawk. Kum 2005 khan Lukaku pu hi a thi a, Belgian striker hian, "A bulah thu ka tiam a, nomawi lian tham ka chawi dawn tih ka hrilh. Hetia ka intiamna ka tihlawhtling thei ta hi ka lawm a ni," tiin thil awm dan a sawifiah.