Aguero a chawl rei dawn

Barcelona striker Sergio Aguero chu La Liga season thar tir lamah kan hmu thei dawn lo. Spanish club lian chuan an player thar hi hliam vangin kar 10 vel tal a chawlh tur thu an puang chiang.

Argentina inter-national hian Manchester City tana a contract a hman zawh hnuah Barca hi season hnih chhung atan a zawm. Catalan club hian Aguero hi a tha hliam a dam loh thu an sawi a, khelmuala a inlan theih hun tur tak erawh hriat a la ni lo.

Kum 33 mi Aguero hian Man City tan khan season 10 chhungin match 390 aṭangin goal 260 a khungsak hman, a vanglai pel deuh tawh mah se hliam loa a inkhel thei a nih chuan player hlauhawm a la ni reng.

Barcelona a zawm chhan pakhat erawh a hlawhtling dawn ta lo. Argentina tana a khelhpui leh a ṭhianpa ni bawk Lionel Messi nen club pakhata khelh dun a duh thu a sawi a, mahse Messi hi Barca aṭangin a chhuak thung si a ni.

La Liga season thar an match hmasa ber atan Barcelona hian August 15 zanah Real Sociedad an mikhual ang.