US Open-ah Andy Murray

Tun thla tawp aṭanga khelh tur US Open-ah Andy Murray a inlan thei dawn a, tun hma lama hlawhtlinna lo chang tawh Stan Wawrinka erawh a ke phah hliam a la dam fel loh avangin New York khawpuiah hian a zin ve thei dawn lo.

Britain tlangval hian 2012 US Open nomawi kha a lo chawi tawh - Grand Slam title a lak hmasak berna hmun a ni bawk. Murray hi Tokyo Olympic-ah khan ram tan a feh chhuak, mahse singles huang aṭanga inhnukdawkin doubles chiah a khel.

Kum 34 mi Murray hi hliam vangin ngai a awh lohna a rei ta hle. US Open a khel a nih pawhin a lakah beisei san ngam a harsa ang, kumin January thla khan Australian Open khelh tum mah se hri leng vangin a khel thei lo.

French Open a khel lo zui a, grass court inelna lian Wimbledon pawh a hmachhawn thei chuang lo - season kal laiah chuan US Open chauh hi major tournament a khelh theih tur niin a lang ta.

World number 1 hlui Murray hian US Open a khelh hnuhnung pahnihah beisei a phak lo, kum 2018 leh 2019 khan second round lekah Canadian tlangval Felix Auger-Aliassime hneh loin a zin kawng a lo tawp tawh a ni.

Murray tan thu lawmawm a awm laiin Wawrinka erawh a hun hnuhnung lamah a buai chhunzawm. Kum 36 mi hian 2016 khan US Open title hi a lo la tawh, kuminah hian inlan hman beisei mah se a hliam an zai a la dam fel hman lo.

Swiss star hian Grand Slam title pathum a la tawh a, player langsar dang - Roger Federer, Rafael Nadal leh Novak Djokovic te nen an hun tawn a in an avangin major title a la hnem lo, season tharah kum 37 mi a nih tawh dawn avangin atan champion a harsa lehzual tawh ang.