Switzerland coach thar Murat Yakin

Swiss football association chuan an ram team enkawl turin Murat Yakin an lakluh thu an puang a, inremna hi World Cup qualifier an khelh zawh thleng atana tih a ni a, pawhsei theihna dan a awm bawk.

Kum 46 mi Yakin hian Vladimir Petkovic hmun ruak a luah dawn. Petkovic khan kum sarih chhung zet an ram team a enkawl hman - Euro 2020 khelh zawh takah khan Swiss team hi a vawi khat nan quarterfinal a hruai thleng.

Season tharah chuan Petkovic-a'n Ligue 1 club Girondins Bordeaux a enkawl dawn, amah thlaktu tur Yakin hi player a nih laia Swiss team captain ni thei a ni a, ram tan match 49 a khel a ni.

A hna hmasa ber atan chuan September 1 hian Basel-ah Greece an hmachhawn ang, chumi hnuah European champion Italy chu a hmun ngaiah an mikhual chhunzawm leh ang.

Yakin chuan, "Player nih laia ram tana khelh phak kha a hluin a ropui, manager nih hnuah mahni ram team enkawl leh phei chu a lawmawm dan a sang zual hle. Player ṭha tak tak nen kan thawkho dawn a, chuvangin World Cup-ah pawh an tling ngei ang," a ti.